Iki sany redaksion ýalňyşlygy bolan Garri Potter baradaky ilkinji seýrek neşir “Hansons” auksionynda 34,5 müň dollara satyldy. Ýüzünde ýara yzy bolan oglanjyk baradaky “Filosofik daş” diýlip atlandyrylan bu eser 1997-nji ýylda 1 dollar 20 sente dynç alyş möwsüminde wagt geçirmek üçin satyn alnypdyr. Soňra kitap takmynan, 20 ýyllap tekjede zerurlygy bolman ýatypdyr. Şeýle kitapdan bary-ýogy 500 sanysy çapdan çykan eken.
“Neşirde iki sany redaksion ýalňyşlygyň bolmagy, onuň esasy aýratynlygydyr” diýip, CNN teleýaýlymy mälim edýär.
Näbelliligine galmak isleýän kitabyň eýesi, öýüni abatlamaga pul zerur bolanda bu kitaby satmaly diýen karara gelýär. “Garri Potteriň” seýrek neşiriniň bahasyny kesgitlemäge bilermen Jim Spenser kömek edipdir. – Meşhur eseriň ilkinji neşiriniň bardygyny aýdýanlaryň köpüsiniň özüne ýüz tutýandygyny, ýöne kitap jikme-jik barlanansoň, onuň hakyky däldigi belli bolýar. Iki ýalňyşlygy bolan bu nusgany hem seýrek kitap hasaplasaň bolar – diýip, Spenser aýdýar. Olaryň birinjisi – soňky daşlygyndaky “filosofik” sözüniň nädogry ýazylmagy, ikinjisi bolsa, 53-nji sahypadaky “bir taýak” sözleminiň iki gezek gaýtalanmasydyr. Ilkinji neşiriň köp bölegi mekdeplere we kitaphanalara iberilipdir. Şol sebäpden hem olar örän seýrek duş gelýärler.
Ýakynda habar berilmegine görä, ýazyjy zenan Joan Rouling “Garri Potteriň” jadyly dünýäsine bagyşlanan hekaýalaryň täze bölümlerini taýýarlaýar.
