Dünýäniň iň uly film studiýalarynyň biri bolan “Disney” dünýäde emele gelen çylşyrymly ýagdaý sebäpli birnäçe filminiň tomaşaçylara ýetirilmeli wagtyny yza süýşürmegini dowam edýär. Kompaniýa onlarça filminiň görkezilmeli wagtyny yza süýşürendigini mälim etdi. Olaryň arasynda “Avatar”, “Star Wars” (“Ýyldyz söweşleri”) ýaly blokbaster, köpleriň sabyrsyzlyk bilen garaşýan filmleri hem bar. “Avatar”-yň nobatdakysynyň indiki ýylyň 17-nji dekabrynda prokata çykmagyna garaşylýardy. Bu senäniň 2022-nji ýylyň 16-njy dekabryna geçirilendigi mälim edildi. Şeýlelikde filmiň ondan soňky bölümleri hem bir ýyl yza süýşüriler. Täze senenama görä, bu filmiň indiki bölümleriniň görkezilmeli seneleri: “Avatar 2” (16.12 2022), “Avatar 3” (20.12.2024), “Avatar 4” (18.12.2026) we “Avatar 5” (22.12.2028). ýeri gelende aýtsak, ilkinjisi 2009-njy ýylda görkezilen we uly mukdarda girdeji gazanan “Avatar”-yň ikinjisi 2014-nji ýylda çykmalydy. Emma käbir sebäplere görä, bu sene 2021-nji ýyla süýşürilipdi.
“Disney”-iň ýene bir köp bölümli filmi bolan “Ýyldyz söweşleriniň” hem görkezilişi yza süýşürildi. Täze senenama görä bu filmiň görkeziljek seneleri: Nämälim ýyldyz söweşleri 1” (22.11.2023), “Nämälim ýyldyz söweşleri 2” (19.12.2025) we “Nämälim ýyldyz söweşleri 3” (17.12.2026).
Kompaniýanyň şu ýylyň martynda görkezilmegine garaşylýan “Mulan” filminiň ilki 21-nji awgusta görkeziljekdigi aýdylypdy. Emma soňky beýanatda bu filmiň prokata çykjak senesiniň täze senenamadan doly aýrylandygy mälim edildi. Ýagny filmiň tomaşaçylara haçan ýetiriljekdigi häzirlikçe nämälim bolmagyna galýar.
