89-njy Oskar baýraklarynyň gowşurylyş dabarasy öňümizdäki ýylyň 26-njy fewralynda adatça bolşy ýaly, Los Anjelesdäki “Dolby” teatrynda geçiriler. Onda 24 ugurdan Oskar heýkeljikleri öz mynasyplaryna berler. Şolaryň biri-de daşary ýurt dilindäki iň gowy film ugry bolup, golaýda dalaşgärleriň ilkinji sanawy mälim edildi. Başlangyç sanawa jemi 89 ýurt ýüz tutdy. Ýöne şolaryň 4-si hasaba alynman, 85 film dalaşgärlige hödürlendi. Hadija al-Salaminiň režissýorlygyndaky “I’m Nojoom, age 10 and Divorced” atly kino Ýemeniň adyndan dalaşgär bolan ilkinji film diýlip hasaba alyndy. Şol 25 filmiň arasyndan ispaniýaly Pedro Almodowaryň “Hulieta”, russiýaly Andreý Konçalowskiýniň “Uçmah”, gollandiýaly meşhur režissýor Pol Werhoweniň Fransiýanyň adyndan wekilçilik edýän “Zenan”, italiýaly Jianfranko Rosiniň bosgunlar baradaky “Altyn aýy” baýrakly ekran eseri “Deňizdäki ýangyn”, ýaponiýaly Ýoži Ýamadanyň “Nagasaki: meniň oglumyň ýatlamalary”, rumyniýaly Kristi Puiunyň “Sieranewada”, çilili Pablo Larrainiň “Neruda”, oskaryň eýesi bosniýaly Danis Tanowiçiň “Saraýewadaky ölüm”, kanadaly Ksawie Dolanyň “Bu diňe dünýäniň soňy”, 2 ýyl öň Oskar gazanan eýranly Asgar Farhadiniň “Satyjy”, meksikaly Honas Kuaronyň “Desierto” ýaly filmleri Oskaryň esasy faworitleriniň hatarynda görkezilýär. Daşary ýurt dilindäki iň gowy film baýragyny geçen 88-nji dabarada wengriýaly Laslo Nemesiň “Soluň ogly” kinosy alypdy.
Daşary ýurt dilindäki filmleriň dalaşgär bolmagy üçin oktýabr aýynyň başyndan geljek ýylyň sentýabr aýynyň ahyryna çenli aralykda degişli döwletiň kinoteatrlarynda görkezilmegi zerurdyr.
85 filmlik sanaw dekabr aýynda 9-a düşüriler. Jemleýji sanaw bolsa, Oskaryň beýleki dalaşgärleri bilen bilelikde geljek ýylyň 24-nji ýanwarynda mälim ediler.
