Angliýanyň çempionatynda 27-nji tapgyryň jemleýji duşuşygynda “Arsenal” myhmançylykda autsaýder, iň aşaky orunda barýan “Şeffild Ýunaýted” bilen duşuşdy. Turuwbaşdan londonlylaryň üstünliginde geçen oýunda “Arsenal” garşydaşynyň derwezesinden jogapsyz 6 gol girizdi. Gollaryň 5-si 1-nji ýarymda geçirilip, duşuşykda 5-nji minutda Edegor, 13-nji minutda Bogl (awtogol), 15-nji minutda Martinelli, 25-nji minutda Hawerts, 39-njy minutda Raýs hem-de 58-nji minutda Waýt tapawutlandy. Şunlukda, “Arsenal” çempionatda bassyr 7-nji ýeňşini gazandy. Olar şol 7 duşuşykda 31 gol geçirmegi başardy. “Kristal Palas” bilen “Börnli” toparlarynyň derwezesinden 5, “West Ham” bilen “Şeffild Ýunaýted” toparlarynyň derwezesinden jogapsyz 6 gol geçiren “Arsenal” “Nýukasly” 4-1, “Liwerpuly” 3-1, “Nottingam Foresti” 2-1 hasaplar bilen ýeňdi. Çempionatda 68 gol geçiren “Arsenal” bu ugurda Ýewropanyň TOP 5 çempionatynda diňe 69 golly “Interden” yzda barýar.
