Şu ýylyň 16-njy fewralynda Hytaýyň Aý senenamasyna görä, Täze ýyl baýramçylygynyň dabaralary başlandy. Ol ýurduň iň uly hem-de uzak wagtlap dowam edýän baýramçylyklarynyň biridir. Täze ýyl baýramçylygy döwründe ýurduň ilaty 15-21-nji fewral aralygynda, ýagny 7 gün dynç alýar. Kä ýerlerde 15 gün dowam edýär. Irki döwürlerde bu baýramçylyk günlerinde 1 aýlap dynç alnypdyr. Ýöne häzirki döwürde 1 aýlyk dynç alşyň köp bolandygy üçin azaldylypdyr.
Hytaýlylar Täze ýyly baharyň başlangyjy hökmünde kabul edýärler. Bu baýramçylykdan soňra ekin işlerine girişilýär. Hytaýda Täze ýyl gyşyň ýaz bilen duşuşmagy hem-de täze hasabat döwrüniň başlanmagy hökmünde kabul edilýär.
Aziýa yklymynda Täze ýyl maşgala baýramçylygy hökmünde bellenýär. Bu döwürde maşgala agzalary bir ýere jem bolup, baýramçylygy giňden belleýärler. Şonuň üçin bu baýramçylyk döwründe Hytaýda ulag ulgamynda gyzgalaňly döwür başlanýar.
Ýurduň ähli ýerinde dürli baýramçylyk çäreleri geçirilýär. Bu dabaralar asmana feýerwerk atmak bilen başlanýar. Hytaýyň Guançžou şäherindäki dünýäniň iň beýik ikinji telediňi bolan “Canton Tower”-de yşykly görkezme çykyşlary köpleriň ünsüni çekýär. Täze ýyl it ýyly bolandygy üçin ýurduň köp ýerinde äpet it heýkelleri dikildi.
Hytaý heýkeltaraşlary Täze ýylyň öňüsyrasynda Lýaoniniň Şenýan şäherine golaý ýerde gardan äpet itleriň heýkelini ýasadylar. “Xinhua” agentliginiň habar bermegine görä, 60 müň kubmetr gardan dört güjükli itiň heýkel kompozisiýasyny döretmek üçin 100-den gowrak heýkeltaraş hepdeläp zähmet çekipdirler. Heýkeliň belentligi 20 metr, ini 55,66 metr, uzynlygy bolsa, 120 metrden ybarat.
Köçeler dürli reňkli çyralar bilen bezelip, ähli ýerlerde plakat görnüşindäki itleriň şekilleri, heýkelleridir suratlary ýerleşdirildi. Dükanlarda adatça ýüpekden edilen dürli ölçeglerdäki oýnawaç itler uly meşhurlyga eýe boldy.
