Aziýanyň infrastruktura boýunça maýa goýumlar bankynyň dolandyryjylar geňeşiniň ilkinji mejlisi geçirildi. Hytaýyň paýtagty Pekin şäherinde geçirilen bu ýygnakda käbir taslamalara ilkinji maliýe kömegini bermek hakyndaky çözgüt kabul edildi.
Maliýe edarasynyň ilkinji ýygnagyna Hytaý Halk Respublikasynyň Hökümet başlygynyň orunbasary Çžan Gaoli hem gatnaşdy. Ol bu ýerde eden çykyşynda Aziýanyň bankynyň beýleki maliýe edaralary bilen ysnyşykly hyzmatdaşlyk gatnaşyklaryny ýola goýmaga başlandygyny mälim etdi. Hytaýyň ýokary derejeli döwlet ýolbaşçysy bankyň düzümindäki döwletleriň agramly böleginiň Ýüpek ýolunyň ugrunda ýerleşýändigini belläp, bu ugurda täze başlangyçlaryň durmuşa geçirilmegine degerli ýardam etjekdigini aýtdy.
2015-nji ýylyň iýun aýynda döredilen bankyň düzüminde 57 döwlet bar. Geljek ýyllarda bu görkeziji 100-e golaýlar. Bu barada Aziýanyň infrastrukturalar boýunça maýa goýumlar bankynyň başlygy Szin Lisýun habar berdi. Onuň aýtmagyna görä, şu ýylyň ahyryna çenli agza ýurtlaryň sany 100-e ýeter. 2017-nji ýyldan täze agzalar kabul edilip başlanar.
Aziýanyň iri maliýe edaralarynyň birine öwrülen bu bank özüniň ilkinji taslamalaryny maliýeleşdirmek hakyndaky çözgüdi kabul etdi. Bu ugurda – Bangladeşde, Indoneziýada, Pakistanda hem-de Täjigistanda taslamalar durmuşa geçiriler. Munuň üçin 509 million dollar maliýe kömegi gönükdiriler.
– Biziň işe başlanymyza alty aý boldy. Bankyň öz üstüne alan wezipelerini ýerine ýetirmäge başlandygy meni diýseň begendirýär. Biz ilkinji taslamalarymyzy durmuşa geçirmäge başladyk. Aziýa ýurtlarynda ilkinji 4 taslamany maliýeleşdirmek babatda ýörite gazna döredildi – diýip, bankyň başlygy aýtdy.
