Kanadanyň Premýer-ministri Jastin Trýudonyň ýolbaşçylyk edýän dolandyryjy Liberal partiýasy 21-nji oktýabrda geçirilen parlament saýlawlarynda 37,5% ses bilen ýeňiş gazandy. Konserwatiw partiýasy 34,3% ses bilen ikinji orny, “Kwebek bileleşigi” 8,7% ses bilen üçünji orny eýeledi.
20-nji oktýabrda Moldowa Respublikasynda ýerli häkimiýet edaralarynyň saýlawlary geçirildi. Respublikanyň raýatlary şäher we oba ýolbaşçylarynyň 898-sini hem-de ýerli halk deputatlarynyň (şäher, etrap we oba geňeşlikleri) 11 müňden gowragyny saýladylar. Ýurtda 2,8 million saýlawçynyň ses bermäge hukugy bar.
23-24-nji oktýabrda Russiýanyň Soçi şäherinde “Russiýa-Afrika” sammiti geçirildi. Sammite Afrika yklymynyň 40-dan gowrak liderleri gatnaşdylar. Sammitiň çäklerinde yklymyň infrastruktura taslamalaryna maýa goýmak, oba hojalygy, saglygy goraýyş we sanly ykdysadyýet ýaly möhüm meselelere garaldy. Häzirki wagtda Russiýa bilen Afrika ýurtlarynyň arasyndaky haryt dolanyşygy iki esse artyp, 20 milliard dollara ýetdi.
Tunisiň täze saýlanan Prezidenti Kais Said 23-nji oktýabrda geçirilen kasam kabul ediş dabarasyndan soň, resmi taýdan wezipesine girişdi. 13-nji oktýabrda geçirilen saýlawlaryň ikinji tapgyrynda 61 ýaşly hukuk boýunça professor sesleriň 72,71 göterimi bilen ynamly ýeňiş gazanypdy. Tunisiň Prezidenti bäş ýyllyk möhlet bilen saýlanýar.
“Forbes” žurnaly soňky ýyllaryň içinde ösüşiniň hil taýdan ýokary derejelere çykan Russiýanyň 10 şäheriniň sanawyny mälim etdi. Sanawyň başyny Nižniý Nowgorod şäheri çekdi. Ikinji orunda Sankt-Peterburg, üçünji orunda Kazan, dördünji orunda Ýekaterinburg, bäşinji orunda Wladiwostok gelýär. Onluga Krasnoýarsk, Tula, Ýaroslawl, Kostroma we Irkutsk girýär.
