Belgiýada üç ölçegli printeri ulanmak arkaly dünýäde ilkinji iki gatly jaý guruldy. Üç ölçegli (3D) çap tehnologiýasy dünýädäki gurluşyk pudagynyň aýrylmaz bölegine öwrülýär. Binagär Pit Weilemans bu jaýyň nähili gurlandygyny düşündirýär:
– Bu ýerde diwarlar göni, diwaryň gurluşyna siňe seretseňiz, onuň dürli gatlaklardan ybaratdygyna göz ýetirýärsiňiz.
90 inedördül metrlik jaý üçin beton diwarlar, gatlak-gatlak edilip, awtomatik ulgam bilen bina edildi. 15 gün dowam eden taslama bilen gurluşyk pudagynyň wekilleri gyzyklanyp ugradylar.
– Şunuň ýaly gurluşygyň netijesinde, kömürturşy gazy howa 50% az çykýar, üstesine-de wagt tygşytlanyp, gurluşyk ýokary depginde amala aşyrylýar – diýip, binagär Pit Weilemans aýtdy.
3D arkaly gurlan bu jaý Antwerpen sebitiniň Westerlo etrabynda ýerleşýär. Ol Tomas Mor adyndaky uniwersitetiň talyplarynyň diplom işleriniň baş mowzugy boldy.
– Biz üýtgeşik tejribä eýe bolduk. Indi şeýle ajaýyp, göze görnüp duran netije bilen okuwymyzy tamamlap bileris. Bu jaý bu ýerde galar we her kim ony synlap biler – diýip, talyplar aýdýarlar.
Üç ölçegli printeriň kömegi bilen ilkinji bir gatly jaý iki ýyl mundan ozal, Fransiýada gurlupdy. Hünärmenler täze tehnologiýalaryň bazarda programmirleme we gurluşyk materiallaryny döretmek ugurlarynda täze iş ýerleriniň peýda boljakdygyny aňladýandygyny aýdýarlar.
