HABAR – SELJERME
Tomusky transfer möwsüminde Angliýanyň «Premier Ligasynyň» wekili «Wulwerhempton» topary düzümindäki portugal futbolçylarynyň sany bilen köpleriň ünsüni çekipdi. Çempionatda öňdebaryjy toparlary ýeňmegi bilen hem tanalýan klubuň düzüminde häzirki wagtda portugaliýaly 8 futbolçy çykyş edýär. Toparyň tälimçisi hem portugaliýaly bolan klubuň 2 portugal futbolçysy-da başga klublarda kärendesine oýnaýar. Häzirki wagtda «Premier Ligada» oýnaýan portugaliýaly 18 futbolçynyň 8-si bu klubuň köýnekçesini geýýär.
Bir döwürler «Milanda» niderland, «Interde» germaniýaly, «Barselonada» 1990-njy ýyllaryň aýagynda, 2000-nji ýyllaryň başynda niderland, soňra brazil futbolçylary ady agzalan bu toparlary ýeňişlerden ýeňişlere ýetiripdi. Edil şonuň ýaly, «Wulwerhemton» toparynyň gazanýan üstünliklerinde portugal futbolynyň wekilleri uly orun eýeleýär.
2016-njy ýylda portugallaşyp başlaýar
1877-nji ýylda esaslandyrylan klub Angliýanyň Ýokary ligasynda 1950-nji ýyllarda 3 gezek çempionlyk gazanýar. West Midlands regionynyň Wulwerhempton şäheriniň adybir kluby Angliýanyň iň ýokary ligasynda 67-nji möwsümini geçirýär. 1992-nji ýylda esaslandyrylan «Premier Ligada» ilkinji gezek 2003/04 möwsüminde çykyş edip başlan «Wulwerhempton» topary 2009–2012-nji ýyllarda 3 möwsümden soň ilki 2-nji, hatda 3-nji liga hem düşdi. 2018/19 möwsüminde 3-nji gezek «Premier Liga» dolanan Möjekler (Wolves) lakamly topar 2016/17 möwsüminden «portugallaşyp» başlaýar. Silwio, Žoao Teişeira, Helder Kosta, Iwan Kawaliero ýaly futbolçylar klubdaky ilkinji portugallar bolýar. 2017-nji ýylyň maýynda portugaliýaly Nuno Espirito Santony tälimçilige bellenilýär. Futbolçylyk ýyllarynda derwezede duran Nuno Espirito ozal «Rio Awe», «Walensiýa», «Porto» toparlarynda işläpdi. Onuň gelmeginden soň, klubdaky portugallaryň sany artyp başlaýar. 2017/18 möwsüminde Ruben Neweş, Diogo Žoto (kärendesine) ýaly portugal futbolçylary topara transfer edilýär. 2018/19 möwsüminde-de meşhur derwezeçi Rui Patrisio, belli ýarymgoragçy Žoao Moutinio bilen şertnama baglaşylýar, Žotonyň hem transfer tölegi berlip, ymykly ýagdaýda düzüme goşulýar. 2019/20 möwsüminde «Olimpiakosdan» Daniel Podense, «Bragadan» Bruno Žordao, «Lasiodan» Petro Neto, şu möwsümiň başynda bolsa, «Monakodan» Witinýa (kärendesine), «Barselonadan» Nelson Semedo (30 mln. funt), «Portodan» Fabio Silwa (35 mln. funt) transfer edilýär. Şol birwagtyň özünde-de möwsümiň başynda Diego Žotony «Liwerpula» 45, Helder Kostany-da «Lids Ýunaýtede» 16 million funt sterlinge satýar.
Başda-da belleýşimiz ýaly, «Wulwerhempton» toparynda häzirki wagtda 8 portugal futbolçysy çykyş edýär. Bu bolsa Portugaliýanyň çempionatynda çykyş edýän «Boawişta», «Maritimo», «Portimonense» ýaly klublaryň düzümlerindäki portugal futbolçylaryndan hem köp diýmekdir. «Nasional», «Benfika» ýaly toparlaryň hataryndaky portugal futbolçylarynyň sanyna bolsa deňdir. Klubda häzirki wagtda derwezeçi Rui Patrisio, goragçy Nelson Samedo, ýarymgoragçylar Ruben Neweş, Žoao Moutinio, Witinýa, Pedro Neto, hüjümçiler Daniel Podense hem-de Fabian Silwa ýaly portugal futbolçylar bolup, olaryň 2-sinden galany yzygiderli ýagdaýda esasy düzümde oýnaýarlar. Diňe Witinýa bilen Fabian Silwa aglaba ätiýaçdan oýna girýärler. Topar möwsüme şowly başlasa-da noýabr aýyndan bäri yzygiderli ýeňiş gazanmakda kynçylyk çekýär. «Wulwerhemptonyň» çempionatda geçiren 23 golunyň 13-sini portugal futbolçylar (Neto 4, Podense 3, Neweş 3, Fabian Silwa 2, Moutinio 1) derwezä girizdi.
Toparda portugal futbolçylarynyň şeýle köp bolmagynda dünýä belli menejer Horge Mendesiň hem klub bilen işleşýändiginiň täsiri bar. Ronaldo, Feliks, Hames Rodriges, Mourinio, De Hea, Lekler, Mamona, Morais, Žoao Sousa ýaly sportuň dürli görnüşleriniň wekilleriniň menejeri hökmünde tanalýan Mendes «Wulwerhempton» toparyna portugal futbolçylarynyň transfer bolmagynda esasy roly oýnaýar.
Toparda portugal futbolçylarynyň köp bolmagy adaty hem-de internet metbugatynyň üns merkezinden düşenok. «Wulwerhempton» klubuny Portugaliýanyň ýygyndysyna meňzedýänleriň sany az däl. Eger-de Ronaldonyň hem karýerasynyň ahyrynda bu kluba gelen ýagdaýynda, onda laýyk Portugaliýanyň ýygyndysynyň emele geljekdigi bellenilýär. Sentýabr aýynda şu möwsümde klubuň geýjek köýnekçeleri tanadylypdy. Şonda toparyň 3-nji köýnekçesiniň edil Portugaliýanyň milli ýygyndysynyň köýnekçesine meňzeş bolmagy köpleriň ünsüni özüne çekipdi.
Şu möwsümde «Premier Ligada» noýabr aýynyň tälimçisi saýlanan Nuno Espiritonyň tälimçiliginde, topar geçen 2 möwsümde hem çempionaty 7-nji orunda tamamlapdy. Geçen möwsümde Ýewropa ligasynda ýarym finala çenli çykmagy başaran klubuň portugallar bilen ýeten derejesiniň näçe wagtlap dowam etjekdigini bolsa wagt görkezer.
