Golaýda Türkmenistanyň Prezidenti Internetiň we beýleki aragatnaşyk hyzmatlarynyň bahasyna gaýtadan seretmegi, şeýle hem Internetiň ilat üçin elýeterliligini üpjün etmegi tabşyrdy. Degişli görkezmeler ulag-kommunikasiýa ulgamyny ösdürmek boýunça geçirilen iş maslahatynda berildi.
Türkmenistanyň Prezidenti hökümetde bu pudaga gözegçilik edýän wise-premýer B.Öwezowa hem-de ulag we aragatnaşyk toplumynyň ýolbaşçylaryna ýüzlenip, çökgünlige garşy 2020-2021-nji ýyllar üçin maksatnama laýyklykda hem-de elektron söwdasynyň, Internet hyzmatlarynyň, uzak aralykdan işlemegiň we okatmagyň giňden ýaýramagy bilen baglylykda, aragatnaşyk hyzmatlarynyň hiliniň we geçirijilik ukybynyň gowulandyrmalydygyny aýtdy.
«Türkmenaragatnaşyk» agentliginiň çözgüdi bilen ADSL tehnologiýasy boýunça Internetden peýdalanmaga çäklendirilen nyrhnama we ADSL, VDSL tehnologiýalar boýunça Internetden çäksiz peýdalanmak, şeýle hem bölünip berlen infokanalyň kärendesine nyrhnamalar arzanladyldy.
Şäherleriň, welaýatlaryň etraplarynyň ilaty, döwlet kärhanalary we guramalary, hususy telekeçiler, daşary ýurtly maýadarsyz döwlete degişli bolmadyk hukuk taraplary (hojalyk jemgyýetleri, hususy kärhanalar we beýlekiler) hem-de Türkmenistanyň ylym we bilim edaralary üçin aýry-aýry nyrhnamalar arzanladyldy. Bahalar ortaça 22 göterimden 52 göterime çenli peseldi. Täze nyrhnamalar barada «Türkmentelekomyň» we AŞTU-nyň resmi internet saýtlarynda giňişleýin maglumat berilýär.
«Türkmenaragatnaşyk» agentligi bellenilen nyrhnamalaryň bir gezeklik ýa-da wagtlaýyn çäre däl-de, «Döwlet – adam üçindir» diýen uzak möhletleýin syýasatyň bir bölegidigini aýratyn belleýär.
