Aýdym-saz dünýäsiniň abraýly sylaglaryndan MTV Ýewropa aýdym-saz baýraklarynyň bu ýylky dalaşgärleri mälim edildi. Jastin Biber bilen Beýonse Nowles 5 ugurdan dalaşgär görkezilip, bu babatda öňdeligi eýelediler. Adel, “Coldplay”, Şawn Mendes hem-de Lukas Graham dagy bolsa, 4 ugurdan dalaşgärlige hödürlendi. Iň gowy aýdym diýlen ugurda “Hello” (Adel), “Sorry” (Jastin Biber), “7 Years” (Lukas Graham), “I Took a Pill in Ibiza (Seeb Remix)” (Maýk Posner) hem-de “Work” (Rihanna bilen Dreýk) atly aýdymlar bäsleşer. Iň gowy wideo baýragy-da “Formation” (Beýonse), “Up&Up” (“Coldplay”), “Famous” (Kanýe West), “The Less I Know the Better” (Teým Impala) hem-de “Starboy” (The Weeknd bilen Daft Punk) atly şekilli aýdymlaryň haýsy hem bolsa birine berler. 23-nji sapar geçiriljek dabara 6-njy noýabrda Gollandiýanyň Rotterdam şäherinde guralar.
***
Amerikaly owadan aýdymçy gyz Selena Gomeziň surat paýlaşylýan sosial internet ulgamy bolan “Instagramdaky” muşdaklarynyň sany 100 milliondan geçdi. 24 ýaşly Gomez bu ugurda 100 million muşdaga ýeten ilkinji şahsyýet diýlip hasaba alyndy. Gomeziň jorasy, amerikaly başga bir aýdymçy zenan Teýlor Swift bu sanawda 2-nji ýeri eýeleýär. Onuň “Instagramdaky” muşdaklarynyň sany 91,4 milliona deň. Aýdymçy Beýonse Nowles 85,3 million hem-de Kim Kardaşian 83,6 million muşdak bilen 3–4-nji orunlarda barýarlar.
***
Aktýor Adam Brodi bilen aktrisa Amanda Kruýw “The Wanting” atly trillerde baş keşpleri janlandyrarlar. “Ýol” (The Road) filmi bilen adygan Ýam Laranasyň režissýorlyk etjek kinosynyň ssenarisini Donald Martin ýazar. Öňümizdäki günlerde surata düşürilip başlanjak filmi geljek ýylyň ahyrlarynda prokata çykarmaklyk meýilleşdirilýär.
***
Aktýor Jeýk Gillenhaal bilen aktrisa Kareý Malligan “Wildlife” atly filmde çykyş eder. Filme aktýor Pol Dano režissýorlyk edip, bu onuň ilkinji surata düşürjek kinosy bolar. Riçard Forduň adybir romany esasynda taýýarlanjak filmiň ssenarisini režissýoryň özi ýazar. Drama görnüşli kino 2017-nji ýylyň güýzünde ekranlara ýaýradylar.
