Belli rus režissýory Klim Şipenko hem-de aktrisa Ýuliýa Peresild şu ýylyň oktýabrynda kino düşmek üçin halkara kosmos bekedine giderler. Russiýanyň kosmosda düşüriljek ilkinji filminiň kastingi belli bolup başlady. 36 ýaşly Ýuliýa Peresild hem-de 37 ýaşly Klim Şipenko 5-nji oktýabrda “Soýuz MS-19” göteriji raketasy arkaly “Baýkonur’ kosmodromyndan Halkara kosmos bekedine uçurylar. “Çagyryş” (Вызов) atly filmde saglyk ýagdaýy sebäpli Ýere gelip bilmeýän kosmonawty kosmos gämisinde bir lukmanyň operasiýa etmeli bolýandygy barada gürrüň berler. “Roscosmos” agentligi bu filmiň kosmosyň gapylarynyň has köp adama açylýandygyny görkezmek maksady bilen düşürilýändigini mälim etdi. Ýeri gelende aýtsak, NASA hem belli aktýor Tom Kruzuň baş keşbini ýerine ýetirmeginde Halkara kosmos bekedinde film surata düşürmegi maksat edinýär. Bu Hollywood filminiň haçan düşürilip başlanjakdygy häzirlikçe nämälim. Emma Tom Kruzuň režissýor Dug Liman bilen kosmos bekedine gitmegine garaşylýandygy has öňräk mälim edilipdi. NASA bu taslama üçin “SpaceX” kompaniýasynyň raketasyndan peýdalanyljakdygyny aýan edipdi.
Şeýlelikde kosmosdaky bäsdeşlik kino sungatynda hem täze öwüşgin bilen dowam eder.
Synaglardan üstünlikli geçdiler
“Roscosmos”-yň habar bermegine görä, Peresild we Şipenko bu film üçin saglyk we döredijilik synagyny üstünlikli bermegi başardylar. Olar kosmos gämisinde nähili hereket edilmelidigini öwrenmek üçin 1-nji iýunda okuw geçip başlarlar. Bu okuwyň dowamynda olara grawitasiýasyz ýerde hereket etmek we paraşýutdan bökmek ýaly çylşyrymly işler öwrediler. Kosmosda düşüriljek ilkinji filmde çykyş etmäge gyzyklanma bildirýänleriň sany köp boldy. Peresild baş keşbi ýerine ýetirmäge dalaş edýän 19 aktrisanyň arasyndan saýlandy.
Russiýanyň döwlet teleýaýlymy (Birinji kanal) filme taýýarlyk pursatlarynyň ýaýlyma goýberiljekdigini habar berdi. Filmiň bilelikdäki prodýuserleri hökmünde “Roscosmos”-yň ýolbaşçysy Dmitriý Rogozin hem-de Birinji kanalyň Baş müdiri Konstantin Ernst çykyş ederler.
Peresild mundan ozal “Ülke” (Край), “Sewastopol ugrunda söweş” (Битва за Севастополь) ýaly birnäçe rus drama filminde keşp janlandyrdy. Peresild 2018-nji ýylda Russiýa Federasiýasynyň at gazanan artisti baýragy bilen sylaglandy.
Belli režissýor Şipenko 42 million dollardan gowrak kassa ýygymyny toplan “Serf” hem-de birnäçe baýrak gazanan “Salýut 7” ýaly filmleri surata düşürdi. Režissýor filmlere ssenariý hem ýazýar.
