Beýonse 9 ugurdan dalaşgär
Aýdym-saz dünýäsiniň iň abraýly sylagy bolan 59-njy “Gremmi” baýraklarynda meşhur aýdymçy Beýonse Nowles 9 ugurdan dalaşgärlige hödürlendi. Rihanna, Dreýk we Kanýe West 8, Chance the Rapper bolsa, 7 ugurdan “Gremminiň” hyrydary boldy. Owadan aýdymçy Beýonseniň “Lemonade” atly albomy Adeliň “25”, Jastin Biberiň “Purpose”, Dreýkiň “Views”, Starjill Simpsonyň “A Sailor’s Guide to Earth” albomlary bilen “Gremmi” ugrunda bäsleşer. Ýylyň aýdymy baýragyny Beýonseniň “Formation”, Adeliň “Hello”, Maýk Posneriň “I Took a Pill in Ibiza”, Jastin Biberiň “Love Yourself” hem-de Lukas Grahamyň “7 Years” aýdymlarynyň haýsy hem bolsa biri alar. Ýylyň ýazgysy diýlen ugurda ýene-de şol aýdymlaryň üçüsi – “Formation” (Beýonse), “Hello” (Adel), “7 Years” (Lukas Graham) bilen bir hatarda, Rihannanyň “Work” (Dreýk bilen bilelikde aýdýar) hem-de “Twenty One Pilots” toparynyň “Stressed Out” aýdymlary dalaşgär görkezildi. Ýylyň täze aýdymçysy baýragy ugrunda-da Kelsea Ballerini, “The Chainsmokers”, Chance the Rapper, Maren Morris, Anderson .Paak dagy dalaş eder. 80-e golaý heýkeljigiň gowşuryljak 59-njy “Gremmi” aýdym-saz baýraklarynyň dabarasy öňümizdäki ýylyň 12-nji fewralynda geçiriler. Los Anjelesdäki “Staples Sentrde” boljak çäräni Jeýms Korden alyp barar.
Meşhur aktýor 100 ýaşady
Amerikaly aktýor, prodýuser hem-de režissýor Kirk Duglas 9-njy dekabrda 100 ýaşady. Golliwudyň “Altyn döwri” diýilýän ýyllarynda ençeme filmde surata düşen Kirk Duglas 1916-njy ýylda Nýu Ýorkuň Amsterdam diýen ýerinde dünýä inýär. 1946-njy ýylda kino sungatyna aralaşyp başlan Duglas 100-e golaý ululy-kiçili filmde dürli keşpleri janlandyrýar. Belli aktýor Maýkl Duglasyň kakasy bolan Kirk Duglasyň meşhur kinolary hökmünde “Çempion” (1949), “Ýan Sterling” (1951), “Aňtawçynyň rowaýaty” (1951), “Ýaşamaga bolan hyjuw” (1956), “Wagşy göreş” (1957), şol sanda tanymal režissýor Stenli Kubrigiň surata düşüren “Ýeňiş ýollary” (1957) we “Spartak” (1960) hem-de “Tolgundyryjy günler” (1964) atly filmleri agzamak bolar. 3 gezek iň gowy aktýor ugrunda Oskara dalaşgär bolan Kirk Duglas 2 sapar öýlendi. 4 çaganyň kakasy Duglasa 1996-njy ýylda “Ömürboýy başarnyk” Oskary berildi.
