Geljek ýylyň tomsunda Özbegistanda geçiriljek ýaşlaryň arasyndaky (U23) Aziýa Kubogy ýaryşyna Türkmenistanyň ýygyndysy hem gatnaşar. Saýlama tapgyrynda ildeşlerimiz Iordaniýa hem-de Palestinanyň ýaşlar ýygyndylary bilen duşuşdy. Iordaniýadan 1-0 asgyn gelen ildeşlerimiz Palestinany Hydyrowyň (18, 64) hem-de Ballakowyň (88) gollary 3-1 utdy. Iordaniýa bilen Palestinanyň arasyndaky oýunda-da ýeňiş gazanan bolmady. Şeýlelikde, iň gowy ikinji ýerleriň arasynda Tailandyň toparyndan soň ikinji ýeri eýelän türkmen futbolçylary final tapgyrynda çykyş etmäge hukuk gazandylar. Bu ýaryşa Türkmenistanyň ýaşlar ýygyndysy (U23) ilkinji gezek gatnaşar.
Final tapgyry geljek ýylyň 1-19-njy iýuny aralygynda Özbegistanda geçiriler. “AFC U-23 Asian Cup” ady bilen 5-nji gezek geçiriljek bäsleşige 16 topar gatnaşar. 16 toparyň ýene-de 2-si ertir tamamlanjak saýlama tapgyryndan soň belli bolar. Final tapgyrynyň bijeleri-de öňümizdäki günlerde çekiler (wagty häzirlikçe belli däl).
