Futbol janköýerleriň iň söýgüli bäsleşigi bolan UEFA Çempionlar Ligasynda 2 aýlyk arakesmeden soň 2-nji perde açylýar. Ýagny şu gije 1/8 finalyň duşuşyklaryna badalga berilýär. Tapgyryň ilkinji 4 oýny şu gije hem-de ertir gije oýnalar. Şu gijeki oýunlara seredenimizde, belki-de tapgyryň iň esasy oýny hökmünde görülýän PSŽ- Real Madrid duşuşygy geçiriler. Iki topar şu gijeki oýna çenli UEFA-nyň ýaryşlarynda 10 gezek özara duşuşdylar. Şolaryň 4-sinde Real Madrid, 3-sinde PSŽ ýeňiş gazanyp, 3 oýun deňlikde tamamlandy. Gollarda PSŽ 14-13 öňde.
Şu günki duşuşykda ýerli PSŽ-de Realyň ozalky futbolçysy Serhio Ramos şikesi sebäpli çykyş edip bilmez. Neýmaryň, Real Madridde-de Karim Benzemanyň ýagdaýy näbelli bolup, ispan toparynyň beýleki esasy oýunçylarynyň meýdança çykmagyna garaşylýar. Duşuşyga italiýaly Daniele Orsato eminlik eder. Duşuşyk 01:00-da başlar.
Gijäniň beýleki duşuşygy Portugaliýada bolup, Sporting öz meýdançasynda Mançester Sitini kabul eder. Mundan öň 2012-nji ýylda Ýewropa Ligasynda 1/8 finalda gabatlaşan iki toparyň şol duşuşyklaryndan soň portugal topary ýoluny dowam edipdi (3-2, 0-1). 01:00-da başlanjak oýunda serbiýaly Srdan Ýowanowiç jürlewük çalar.
