1-nji martda paýtagtymyzda Halkara zenanlar gününe bagyşlanyp “Bagtyýarlyk baharynyň şekillendiriş sungatyndaky waspy” atly halkara maslahat we sergi öz işine başlady. Söwda-senagat edarasynda guralan forumda suratkeşleriň, zergärleriň işleriniň, amaly-haşam sungatynyň önümleriniň sergisi ýaýbaňlandyryldy.
Bahar paslynyň esasy bezegi bolan güller serginiň özboluşly nyşanyna öwrüldi. Suratkeşleriň işlerinde, ajaýyp halylaryň nagyşlarynda, zenanlaryň zehininden dörän keşdelerde we zergärçilik önümlerinde gülleriň şekilleri möhüm orun eýeleýär. Misden, bürünçden taýýarlanan dürli görnüşdäki gaplar, küýzäniň we farfor önümleriniň bezegleri, ösümlik dünýäsine bagyşlanan kompozisiýalar bu ýerde guralan çärä özboluşly öwüşgin çaýdy.
Ýurdumyzyň welaýatlarynyň wekilleri küýze önümlerini, çeper halylary we haly önümlerini görkezdiler. Milli lybaslaryň görnüşleriniň we beýleki serişdeleriň özboluşly bezeg aýratynlyklary sergä gatnaşyjylarda uly gyzyklanma döretdi.
Şu ýylyň «Halkyň Arkadagly zamanasy» şygaryna bagyşlanan işlere sergide aýratyn bölüm berlipdir.
Milli medeniýetiň, baý däp-dessurlaryň ruhunda guralan sergide baýramçylyk ýagdaýy emele geldi. Senetçiler, halyçylar, dutar ussalary, ýaş suratkeşler, heýkeltaraşlar, zergärler öz ussatlyklaryny, ukyp-başarnyklaryny görkezdiler.
Sergide görkezilýän gymmatlyklarda zenanlara söýgi we hormat äşgär duýulýar. Berkarar döwletiň täze eýýamynyň Galkynyşy döwrüniň dörediji zenanlary, milli ruhy-ahlak gymmatlyklaryny goraýjylar bolan zähmetsöýer gelin-gyzlar, olaryň duýgy dünýäsi köp asyrlaryň dowamynda medeniýet işgärlerini täze döredijilik gözleglerine ruhlandyrypdyr.
Serginiň açylyş dabarasyna Hökümet agzalary, ministrlikleriň we pudaklaýyn dolandyryş edaralarynyň ýolbaşçylary, ýokary okuw mekdepleriniň rektorlary, jemgyýetçilik guramalarynyň, ýurdumyzda işleýän diplomatik wekilhanalaryň hem-de halkara guramalaryň, köpçülikleýin habar beriş serişdeleriniň wekilleri, medeniýet işgärleri, ýaşlar gatnaşdylar. Onda çykyş edenler hormatly Prezidentimiziň yzygiderli tagallasy netijesinde, ýurdumyzyň zenanlarynyň we ösüp gelýän ýaş nesilleriň döwrebap bilim almagy, sazlaşykly ösüşi, şol sanda hünär almagy we bagtyýar durmuşy üçin ähli zerur şertleriň döredilýändigini nygtadylar.
Mähriban zenanlara bagyşlanan forumyň çäklerinde Döwlet medeniýet merkeziniň Mukamlar köşgüniň Döwlet simfoniki orkestriniň, meşhur estrada aýdymçylarynyň, sungat ussatlarynyň, tans toparlarynyň çykyşlary guraldy.
Günüň ikinji ýarymynda baýramçylyk maksatnamasynyň çäklerinde bu ýerde halkara maslahatyň umumy mejlisi geçirildi. Oňa sanly ulgam arkaly daşary ýurtly wekiller hem gatnaşdylar.
Maslahata gatnaşyjylar ýokary bilim we hünär derejesiniň, oňyn başlangyçlary öňe sürmegiň we giň dünýägaraýşyň häzirki döwrüň zenanlarynyň häsiýetli aýratynlyklary bolup durýandygyny bellediler. Olaryň döwlet sylaglaryna mynasyp bolýanlarynyň sany ýyl-ýyldan artýar. Milletiň ruhy-ahlak gymmatlyklaryny gorap saklamakda, sagdyn durmuş ýörelgesini wagyz etmekde, ýurdumyzyň geljegi bolan ýaş nesilleri watansöýüjilik ruhunda terbiýelemekde we olaryň sazlaşykly ösüşini üpjün etmekde zenanlara möhüm orun degişlidir.
Diýarymyzyň gelin-gyzlary döwlet we jemgyýetçilik işlerine işjeň gatnaşýarlar. Olar döwlet häkimiýet we dolandyryş edaralarynda, ykdysadyýetiň ähli pudaklarynda deň derejede zähmet çekýärler, telekeçilik we jemgyýetçilik işlerini alyp barýarlar. Ýurdumyzyň zenanlary hormatly Prezidentimiziň başlangyjy boýunça durmuşa geçirilýän özgertmelere mynasyp goşant goşýarlar.
Forum Döwlet çeperçilik akademiýasynda hem-de Şekillendiriş sungaty muzeýinde, Döwlet medeniýet merkeziniň Döwlet muzeýinde şekillendiriş sungaty, onuň milli mirasymyzda eýeleýän orny we muzeý gymmatlyklary mowzuklary boýunça geçirildi.
Sergi 8-nji marta çenli dowam eder.
