Angliýanyň Premier Ligasynda Çempionlar Ligasynda gatnaşmak isleýän iki toparyň duşuşygynda Mançester Ýunaýted öz meýdançasynda Tottenhamdan 3-2 üstün çykdy. Mankunianlara ýeňiş getiren gollaryň üçüsini hem super ýyldyz Kristiano Ronaldo geçirdi. Ol 12-nji, 38-nji hem-de 81-nji minutlarda tapawutlanyp, het-trik etdi. Bu onuň Mançester Ýunaýteddäki 2-nji, karýerasyndaky 59-njy het-trigi bolup, portugaliýaly ýyldyzyň gollarynyň sany 807-ä ýetdi. Şeýlelikde, Ronaldo FIFA-nyň hasabatyna görä, futbolyň taryhyndaky iň köp gol geçiren futbolçy rekordynyň täze eýesi boldy. Ronaldo bu ugurda 805 gol geçiren awstriýaly-çehiýaly Ýosef Bisandan öňe saýlandy.
Ronaldo 37 ýaş 35 gün bilen Teddi Şeringemden (37 ýaş 146 gün) soň Premier Ligada het-trik eden iň ýaşuly 2-nji futbolçy boldy. Ronalda Premier Ligada 14 ýyl 59 günden soň 2-nji het-trigini etdi.
Mançester Ýunaýted Premier Ligadaky 400-nji ýeňşini gazanyp, bu görkezijä ýeten ilkinji klub boldy. Şeýle-de Tottenhamy 38-nji gezek ýeňlişe sezewar edip, Premier Ligada bir topary iň köp ýeňen klub hökmünde hasaba alyndy.
