Barselonanyň meşhur stadiony Kamp Nouda taryhy rekord hasaba alyndy. Zenanlaryň arasyndaky UEFA Çempionlar Ligasynyň çärýek finalynyň jogap duşuşygynda Barselona bilen Real Madrid klublary duşuşdy. Ýer eýeleriniň doly artykmaçlygynda geçen oýunda Barselonanyň gyzlar topary 5-2 hasabynda ýeňiş gazanyp, ýarym finala çykdy. Barselona ýeňiş getiren gollary Leon, Bonmati, Pina, Putellas hem-de Hansen geçirdi. Iki oýnuň netijesi boýunça 8-3 ýeňiş gazanan Barselona ýarym finala çykdy.
Duşuşyga 91 müň 553 janköýer tomaşa etdi. Bu bolsa zenan futbolynyň taryhyndaky iň köp tomaşaçyly duşuşyk diýmekdir. Ozalky rekord 1999-njy ýylda Dünýä Kubogynyň finaly bolup, Los Anjelesdäki Rouz Bowl stadionynda ABŞ bilen Hytaýyň zenan ýygyndylarynyň arasynda oýnalan finala 90 müň 195 janköýer tomaşa edipdi.
2019-njy ýylda bolsa Wanda Metropolitano stadionynda oýnalan Atletiko Madrid bilen Barselonanyň zenan toparlarynyň arasyndaky duşuşyga-da 60 müň 739 janköýer gatnaşypdy. Bu bolsa zenan futbolynda klublaryň arasyndaky iň köp tomaşaçyly oýun bolupdy.
Ýeri gelende aýtsak, Kamp Nouda oýnalan erkekleriň arasyndaky El Klasiko duşuşygyna 86 müň 466 janköýer tomaşa edipdi. Zenanlaryň arasyndaky El Klasikoda janköýeriň köp bolandygy aýratyn bellenmäge mynasypdyr.
Çärýek finalyň beýleki bir duşuşygynda PSŽ öz meýdançasynda Bawariýa bilen 2-2 deňme-deň oýnady. PSŽ myhmançylykda 2-1 ýeňiş gazanypdy we ýarym finala çykan topar boldy.
