Brendleriň bahasyny seljermäge ýöriteleşdirilen britan konsalting kompaniýasy “Brand Finans” ýaňy-ýakynda “Soft Power Index 2022” hasabatyny çap etdi. Hasabata laýyklykda, dünýäde iň täsirli ýumşak güýje eýe bolan Afrika ýurtlarynyň ilkinji üçlügine Müsür, Günorta Afrika Respublikasy we Marokko girdi. Bu ýurtlar, degişlilikde, dünýä sanawynda 31-nji, 34-nji we 46-njy orunda durýar. Ondan soň Nigeriýa (yklymda 4-nji we dünýäde 69-njy), Mawrikiý (5-nji we 71-nji), Ruanda (6-njy we 74-nji), Alžir (7-nji we 75-nji), Tunis (8-nji we 76-njy), Gana (9-njy we 86-njy) ) we Madagaskar (10 we 94) gelýär.
Ýyllyk hasabat dünýäniň ähli yklymlaryna we sebitlerine wekilçilik edýän 100-den gowrak ýurtda geçirilen jemgyýetçilik pikir soralyşygyna, şeýle hem hökümet, halkara guramalar, kompaniýalar we jemgyýetçilik guramalarynda karar kabul edýänleriň pikirlerine esaslanýar.
Ýumşak güýç düşünjesi – bir döwletiň, halkara gatnaşyklaryna täsir etmek we serişdeleri toplumy arkaly öz peýdasyna gönükdirmek ukybydyr. Düşünjäniň awtory amerikaly Jozef Naý. Häzirki wagtda Afrika ýurtlarynyň köpüsi öz abraýyny ýokarlandyrmak üçin tagalla edýärler. Käbirleri üçin bu tagallalar diňe syýahatçylyk ýaly pudaklar bilen çäklenýän bolsa, beýlekiler, tersine, iş ugurlaryny diwersifikasiýa etmäge synanyşýarlar. “Brand Finans”-yň barlaglaryna görä, Afrika ýurtlarynyň täsiri soňky döwürlere has-da artdy. Şeýle-de bolsa, şu wagta çenli yklymyň hiç bir ýurdy dünýäniň TOP-20 ýurtlarynyň sanawyna girip bilmedi.
Marokko möhüm diplomatik tagallalary, Nigeriýa bolsa, aýdym-saz we kino ýaly döredijilik we medeni pudaklary bilen aýratyn orun eýeleýär. Mawrikiý hem öz gezeginde milli brendi döretmek, esasan hem, özüniň syýahatçylyk ugurlaryny ilerletmek boýunça köp tagalla edýär. Ýurtlaryň bu tagallalary, tebigy ýagdaýda ýumşak güýç döredip, ada döwletini sanawa girizilenden soň, ilkinji gezek dünýäniň TOP-75 derejesine çykardy. Mundan başga-da, Ruandanyň ösüşinde ýurduň “Ruanda geliň” atly milli brend kampaniýasyny, şeýle-de, kompaniýanyň “Pari Sen-Žermen” futbol kluby bilen hyzmatdaşlygyny göz öňünde tutsaň, garaşylmadyk zat däl. Bu ýagdaý ýurduň indi yklymda iň ýumşak güýç göteriji bolmak ähtimallygyny has-da artdyrýar.
