5-nji noýabrda ýurdumyzda hormatly Prezidentimiziň gatnaşmagynda köpçülikleýin bag ekmek dabarasynyň güýzki möwsümine badalga berildi. Bu özboluşly ekologik çäre paýtagtymyzdaky Magtymguly Pyragynyň täze gurulýan beýik ýadygärliginiň ýanynda geçirildi.
Hormatly Prezidentimiziň awtoulagy ählihalk bag ekmek dabarasynyň badalga beriljek ýerine gelip saklandy. Döwlet Baştutanymyzy çärä gatnaşyjylar mähirli garşyladylar. Ýurdumyzyň sungat ussatlarynyň joşgunly aýdym-sazly çykyşlary dabara gatnaşyjylaryň baýramçylyk ruhuny has-da belende göterdi.
Hormatly Prezidentimiz Serdar Berdimuhamedowyň ýanyna ýaş nesliň wekili baryp, bag ekmek dabarasyna ak pata bermegi haýyş etdi we bag nahalyny oturtmak üçin pili gowşurdy. Döwlet Baştutanymyz ilkinji agaç nahalyny oturtmak bilen, güýzki bag ekmek möwsümine ak pata berdi. Çärä gatnaşyjylar hem bu asylly däbe eýerdiler.
Ýeri gelende bellesek, Türkmenistanyň Prezidentiniň degişli Kararyna laýyklykda, ýurdumyzda ekologik abadançylygy üpjün etmek we tokaý zolaklarynyň çägini giňeltmek maksady bilen, şu ýyl saýaly, pürli, miweli baglaryň hem-de üzümiň jemi 3 million düýbüni ekmek göz öňünde tutuldy. Şu günki ählihalk bag ekmek dabarasy bolsa şol möhüm Kararyň ýylyň dowamynda üstünlikli ýerine ýetirilýändiginiň anyk beýanyna öwrüldi.
Şeýle-de şu gün köpçülikleýin bag ekmek dabarasy Türkmenistanyň Milli Geňeşiniň Halk Maslahatynyň Başlygy Gurbanguly Berdimuhamedowyň gatnaşmagynda Ahal welaýatynyň täze, döwrebap edara ediş merkeziniň golaýynda hem ýaýbaňlandyryldy. Häzirki wagtda täze welaýat merkeziniň gündogar we günbatar künjekleriniň bag-bakjalyga beslenmegi bu ýerde ýakymly howa gurşawynyň emele gelmegini şertlendirýär. Ýakynda Bütindünýä rekordlary guramak boýunça geňeşçi Aýdyn Türkgüjüniň gatnaşmagynda hünärmenleriň 500-den köpüsini özünde jemlän «Organiki bakjalyk we onuň ekologiýa goşýan goşandy» atly okuw sapagy geçirilip, bu ýerde üzümiň «gara kişmiş» görnüşiniň ýarym müňden gowrak düýbünden ybarat üzümçiligiň düýbi tutuldy. Şunlukda, açyk asmanyň astynda guralan bu çäräni Ginnesiň rekordlar kitabyna girizmek teklip edildi.
