Dünýäniň myhmanhana telekeçiliginde öňdeligi eýeleýän “Marriott” kompaniýasy “Starwood” şereketini satyn alandan soňra, syýahatçylyk pudagyndaky maýa goýum taslamalaryny çaltlandyryp, 2019-njy ýyla çenli ozal bar bolan myhmanhanalarynyň üstüni 300 müň sany täze myhmanhana otagy bilen ýetirmek isleýär. Bu hem her 14 sagatda täze bir myhmanhananyň ulanmaga beriljekdigini aňladýar.
Kompaniýa ABŞ-nyň hem-de Hytaýyň bazaryndaky ornuny has-da berkitmek isleýär. Öňde goýlan maksatlara ýetmek üçin girdejilerini ýokarlandyrmagyň meýilnamasynyň hem üstünde işleýän kompaniýa has köp myhmanhana gurup, 675 million dollar möçberinde goşmaça girdeji gazanmagy maksat edinýär.
Bulardan başga-da kompaniýa 3 ýyllyk maksatnamasyna laýyklykda, her bir otaga düşýän girdejisini 1 bilen 3 göterim arasynda artdyrmagy göz öňünde tutýar.
ABŞ-nyň Merilend ştatynda ýerleşýän “Marriott” kompaniýasynyň 122 ýurtda 6 müňden gowrak myhmanhanasy bar. 2019-njy ýyla çenli guruljak täze myhmanhanalary bilen kompaniýa tutuş dünýädäki myhmanhanalaryň 80 göterimine eýe bolar.
Kompaniýanyň düzüminde “Westin”, “Le Méridièn”, “Renaissance”, “St. Regis”, “Ritz-Carlton”, “Four Points by Sheraton”, “AC Hotels”, “Protea”, “Aloft” we “Moxy” ýaly brendler bar.
