Kino sungatynyň iň meşhur 3 festiwalynyň biri bolan Kann film şüweleňiniň bu ýylkysy tamamlandy. 12 günläp dowam eden 70-nji Kann film festiwalynda baş baýrak bolan “Altyn palma” (“Palme d’Or”) ugrunda 19 film bäsleşdi. Festiwalyň ýekşenbe güni geçirilen jemleýji dabarasynda Maren Ade, Fan Binbin, Park Çan-wuk, Jessika Çesteýn, Will Smit, Paolo Sorrentino, Gabriel Ýared hem-de Anýes Žaui dagydan düzülen we ispaniýaly meşhur režissýory Pedro Almodowaryň ýolbaşçylygyndaky eminler topary “Altyn palmanyň” ýeňijisini mälim etdi. Almodowaryň özüniň açan bukjasyndan sanawa soňdan goşulan şwesiýaly režissýor Ruben Estlundyň “Inedördül” (The Square) atly filmi çykdy. “Syýahatçy” atly gara komediýa ekran eseri bilen adygan režissýoryň bu kinosy “Altyn palmany” alan 4-nji şwed filmidir. Italiýaly owadan aktrisa Monika Belluççiniň alyp baran dabarasynda Robin Kampiýonyň “Minutda 120 urgy” (120 Beats per Minute) filmi “Gran Pri” baýragy bilen sylaglandy. Iň gowy režissýor baýragy “Ýowuz meýil” (The Beguiled) filmi üçin zenan kinoçy Sofiýa Koppola gowşuryldy. Iň gowy aktrisa we aktýor baýraklaryna degişlilikde, “Solgun” (In the Fade) filmindäki keşbi üçin Golliwudyň germaniýaly aktrisasy Diana Kruger hem-de “Sen bu ýerde hiç haçan hem bolmadyň” (You Were Never Really Here) kinosynyň ýyldyzy Hoakin Feniks laýyk görüldi. Eminleriň ýörite baýragy “Söýgüsiz” filmi üçin russiýaly režissýor Andreý Zwýaginsewe berildi. Iň gowy ssenariý baýragyny “Mukaddes keýigiň öldürilmegi” (The Killing of a Sacred Deer) hem-de “Sen bu ýerde hiç haçan hem bolmadyň” (You Were Never Really Here) filminiň ssenariçileri paýlaşdy. Şeýle-de festiwalyň 70 ýyllyk ýubileý baýragyna oskarly aktrisa Nikol Kidman mynasyp boldy.
Gysga metražly filmleriň arasynda-da iň gowusy diýlip, hytaýly Sýu Ýanyň “Mylaýym gije” (A Gentle Night) filmi saýlandy. Festiwalyň “Aýratyn garaýyş” bölüminde-de eýranly Mohammad Rasulofyň “Dogruçyl adam” (A Man of Integrity) kinosy baş baýraga laýyk görüldi. Ilkinji filmleri üçin berilýän “Altyn kamera” baýragy-da “Ýaş zenan” (Jeune Femme) kinosy üçin fransiýaly režissýor Leonor Serraile gowşuryldy.
Wenesiýa hem-de Berlin festiwallary bilen bir hatarda, dünýäniň iň öňdebaryjy kino festiwaly hasaplanýan Kann film şüweleňi ilkinji gezek 1946-njy ýylda geçirildi. 1948-nji we 1950-nji ýyllarda dürli sebäplere görä, geçirilmedik festiwal her ýylyň maý aýynda Fransiýanyň kenarýaka, ajaýyp, jana-şypa, owadan şäheri Kannda guralýar. Oňa diňe bir kinoçylar däl, eýsem-de bu şüweleňe sungatyň beýleki görnüşleriniň-de görnükli wekilleri gatnaşýar.
Handurdy Gurbanow,
Türkmen döwlet medeniýet
institutynyň mugallymy.
