Saud Arabystanynyň nebit kompaniýasy “Saudi Arabian Oil Co.” (Saudi Aramco) ýakyn 10 ýylyň dowamynda nebit çykarmak maksady bilen 300 milliarddan gowrak dollar maýa goýmagy meýilleşdirýär – diýip, kompaniýanyň baş direktory Amin Nasser Stambulda geçirilen Bütindünýä nebit kongresinde mälim etdi. Şeýle hem ol kompaniýanyň maýa goýumlarynyň diňe nebit çykarmaga däl, eýsem, ätiýaçlykdan saklanýan kuwwatlyklara, şeýle hem tebigy gazyň ozaldan dowam edip gelýän gözleglerine gönükdiriljekdigini belläp geçdi.
Onuň aýtmagyna görä, indiki 10 ýyllygyň dowamynda “Aramco” gazyň çykarylyşynyň möçberlerini iki esse artdyrar. Kompaniýa her günde 23 milliard kub futo çenli gaz çykarar we netijede, ýurtda 70 göterim töweregi elektrik energiýasy gazdan öndüriler. Nasser munuň ähli G20 döwletleriniň arasynda ortaça görkezijidigini belläp geçdi.
Ol öz çykyşynda nebit pudagynyň ýene-de uzak ýyllap energetikada aýratyn orun eýelejekdigini hem-de ýangyjyň alternatiw çeşmelerine geçmek üçin uzak we çylşyrymly ýoluň geçilmelidigini belläp geçdi.
8–13-nji iýul aralygynda geçirilen kongresiň işine 5 müň adam, şol sanda, 50 ministr, Shell, BP, ExxonMobil, Chevron, Total, Saudi Aramco, SOCAR ýaly dünýäniň öňdebaryjy energetika kompaniýalarynyň ýolbaşçylary gatnaşdy.
Saud Arabystanynyň milli nebit kompaniýasy “Saudi Aramco” 1933-nji ýylda esaslandyryldy. Onuň ştab-kwartirasy Dahranda ýerleşýär. Bu kompaniýa ýurduň ähli nebit çykaryjy kuwwatlyklaryna doly gözegçiligi amala aşyrýar.