PDF
AFK-nyň Çagyryş Ligasynda çykyş edýän “Altyn Asyr” topary toparçadaky ilkinji 2 duşuşygynda ýeňiş gazandy. Duşuşyklar merkezileşdirilen görnüşde Butan döwletiniň paýtagty Thimphuda geçirilýär.
Aragatnaşykçylar 1-nji duşuşygynda Gyrgyzystanyň çempiony “Abdyş-Ata” topary bilen duşuşdy. Duşuşyk 1-0 hasabynda ildeşlerimiziň peýdasyna tamamlandy. Oýundaky ýeke-täk goly 58-nji minutda Myrat Annaýew derwezä girizdi.
Toparçadaky beýleki duşuşykda Omanyň “Al-Şabab” topary ýer eýesi ýurduň wekili “Paro” bilen duşuşdy. Bu oýun hem iň kiçi hasap bilen tamamlanyp, myhmançylykdaky topar Marknehiň 26-njy minutda 11 metrlik jerime urgusyndan geçiren goly esasynda ýeňiş gazandy.
2-nji duşuşyklarda “Altyn Asyr” topary “Paro” toparyndan 3-1 hasabynda üstün çykdy. Çekeleşikli geçen oýunda 9-njy minutda Rahman Myratberdiýew hasaby açdy. 15-nji minutda “Paro” topary Riku Içimuranyň goly bilen hasaby deňledi. Ýöne 37-nji minutda Rahman Myratberdiýew ýene bir gezek tapawutlanyp, aragatnaşykçylary öňe çykardy. 2-nji ýarymda-da Resul Röwşenmyradow 73-nji minutda oýna soňky nokady goýdy.
“Altyn Asyr” toparynyň esasy bäsdeşi “Al-Şabab” topary “Abdyş-Ata” toparyny 2-1 hasabynda ýeňip, utugyny 6-a çykardy. Duşuşykda Gyrgyzstanyň wekili 9-njy minutda Bilýiniň goly bilen öňe geçse-de, omanlylar Al-Saadi (44) hem-de Al-Gafriniň (77) gollary esasynda ýeňşini baýram etdi.
Şunlukda, 2-nji duşuşyklardan soň “Altyn Asyr” topary 6 utuk bilen sanawyň başyny çekýär. Gol aratapawudy boýunça 6 utukly “Al-Şababdan” öňe saýlanýan “Altyn Asyr” topary çärýek finalyň bosagasynda dur. Ertirki oýnaljak “Altyn Asyr” – “Al-Şabab” duşuşygynda ildeşlerimize deňlik hem ýeterlik bolar. Aşgabat wagty bilen 14:00-da başlanjak duşuşykda “Altyn Asyr” topary utulan ýagdaýynda-da, aragatnaşykçylaryň 2-nji ýeri eýelän toparlaryň arasynda iň gowy netije bilen çärýek finala çykmak mümkinçiligi ýokary.
