PDF
UEFA Çempionlar Ligasynda pleý-off tapgyrynyň 4 duşuşygy geçirilip, 1/8 finala çykan klublaryň 4-si belli boldy.
Tapgyryň hemmäni geň galdyran netijesi Milan şäherinde hasaba alyndy. Bu ýaryşyň 3 gezek çempiony, geçen möwsümiň finalçysy “Inter” toparyna Norwegiýanyň garaşylmadyk topary “Bude-Glimti öz meýdançasynda hem ýeňmek başartmady. Bir hepde öň Norwegiýada 3-1 hasabynda utulan “Inter” “San Siroda” hem ýeňlişe sezewar boldy. 2-0 hasabynda öňe saýlanan Bude-Glimtiň gollaryny 58-nji minutda Ýens Peter Hauge bilen 72-nji minutda Hakon Ewýen derwezä girizdi. Haugeniň 2020/21 möwsüminde “Interiň” köne bäsdeşi “Milanyň” düzüminde oýnandygyny hem belläliň. “Interde” Bastoniniň 76-njy minutdaky goly ýeňşe ýetmedi.
Şunlukda, taryhynda ilkinji gezek bu ýaryşa gatnaşýan “Bude-Glimt” topary 1/8 finala adyny ýazdyrdy. Norwegiýanyň wekili liga tapgyryny 23-nji orunda tamamlapdy. “Bude-Glimtiň” indiki garşydaşy “Mançester Siti” ýa-da “Sporting” bolar. Olar liga tapgyrynda “Mançester Sitini” 3-1 hasabynda ýeňipdiler.
