PDF
UEFA Çempionlar Ligasynda liga tapgyrynyň 8-nji, jemleýji duşuşyklary gije oýnalar. Şu gije 18 duşuşygyň ählisi hem bir wagtda, ýagny Aşgabat wagty bilen ýarygijeden soň, 01:00-da başlanar. Futbol janköýerlerine uly futbol baýramçylygy garaşyp, olar ýarygijeden soň 18 nokatdan geljek hasaplar bilen gümra bolarlar. 90, goşmaçalar bilen 100 minutlap, dowam etjek futbol baýramçylygynda her geçirilen goluň hem ähmiýeti uly bolup, klublaryň käbirleri ilkinji 8-likde galmak, käbirleri, ilkinji 8-lige girmek, käbirleri-de 24 toparyň biri bolmak, käbirleri-de şolaryň arasyna girmek üçin ýiti göreş alyp bararlar.
18 duşuşygyň 2-sinden galany, toparlaryň ýaryşdaky ykbalyny, orunlaryny kesgitlär. Diňe 2 duşuşyk – “Ýang Boýz” bilen “Srwena Zwezdanyň”, “Şturm Gras” bilenem “Leipsigiň” arasyndaky oýunlaryň toparlara täsiri ýetmez. Sebäbi bu 4 klub hem ýaryş bilen hoşlaşyp, şolardan “Ýang Boýzuň” entek utugy ýok.
“Mançester Sitiniň” garşydaşy “Klub Brýugge” 20 oýundan bäri ýeňlenok
2022/23 möwsüminiň çempiony “Mançester Siti” 8-nji tapgyrdan öň 25-nji orunda bolup, olaryň ýeňiş gazanmagy zerurdyr. Pep Guardiolanyň şägirtleri öz meýdançasynda “Klub Brýuggeni” kabul ederler. Öňki özara 2 duşuşykda iňlis kluby garşydaşynyň derwezesinden 9 gol geçiripdi. Ýöne häzirki wagtda “Klub Brýugge” ähli ýaryşlary alanyňda 20 oýundan bäri ýeňilmän gelýär.
Häzirki wagtda 22-nji orunda bolan PSŽ hem ilkinji 24 toparyň arasynda galmak üçin 24-nji orundaky “Ştutgartyň” myhmany bolar. Parižlilere ýeňiş zerur bolup, deňlik ýagdaýynda, beýleki oýunlaryň netijeleri olaryň ykbaly kesgitlär.
Sanawyň lideri “Liwerpul” 8-nji duşuşygynda-da ýeňiş gazanmak isleýär. Arne Slotuň şägirtleri 19-njy orundaky PSW-nyň myhmany bolar.
Kubogyň soňky eýesi “Real Madrid” myhmançylykda ýaryşyň sýurpriz topary “Brest” bilen duşuşar. Iki topar hem ilkinji 24-likde galar. Ýöne gazanyljak ýeňiş olaryň birini ilkinji 8-lige hem düşürip biler.
8-nji tapgyryň iki toparyň adyna seredeniňde, iň esasy oýny Turinde oýnalar. Çempionlar Ligasynyň final oýunlarynda iň köp utulan 2 toparyň – “Ýuwentus” bilen “Benfikanyň” arasyndaky duşuşyk tapgyryň iň esasy duşuşygy hasaplanýar. “Barselona” bilen “Atalantanyň” arasyndaky oýnam janköýerleriň esasy üns merkezinde bolar. “Atalantada” toparyň esasy ýyldyzy Ademolu Lukman şikes sebäpli oýnap bilmez.
Pleý-offuň bijeleri 31-nji ýanwarda
Şeýle-de, ýaryşy 9-16-njy orunlarda tamamlanlar bilen 17-24-nji orunlarda tamamlanlaryň arasyndaky bije 31-nji ýanwarda anna güni çekiler. Bije çekiliş 16:00-da başlar. Bu bijäniň duşuşyklary bolsa 11-12-nji hem-de 18-19-njy fewralda oýnalar.
8-nji tapgyryň duşuşyklary (01:00) Aston Willa – Seltik Baýer – Sparta Praga Borussiýa Dortmund – Şahtýor Donesk Ýang Boýz – Srwena Zwezda Barselona – Atalanta Bawariýa – Slowan Bratislawa Inter – Monako Red Bull Salsburg – Atletiko Madrid Žirona – Arsenal Dinamo Zagreb – Milan Ýuwentus – Benfika Lill – Feýenoord Mançester Siti – Klub Brýugge PSW – Liwerpul Şturm Gras – Leipsig Sporting – Bolonýa Brest – Real Madrid Ştutgart – PSŽ
