PDF
31-nji martda Türkmenistanyň Çeperçilik sergiler müdirligi we şekillendiriş sungatynyň sergi merkeziniň Sergi jaýynda, Türkmenistanyň Suratkeşler birleşiginiň agzasy, Türkmenistanyň sungatda at gazanan işgäri Oraz Agabaýewiň şahsy döredijilik sergisi açyldy. Suratkeşiň «Daragtyň miwesi» toplumy, «Ýolagçylar», «Ýol işçiler», «Duşuşyga», «Maşgala», «Gowagyň syry», «Dünýäler», «Geň myhman», «Täsin guş» ýaly eserleri bellenmäge mynasypdyr.
Taryhyň dürli döwürlerinde grafika sungatynda dörän eserler halkyň ruhuny galkyndyrmakda uly ähmiýete eýe bolupdyr. Suratkeş Oraz Agabaýew grafika sungatynyň mirasyny baýlaşdyrjak ajaýyp eserler toplumlaryny döretdi. Halypa suratkeş ýurdumyzda geçirilýän sergilere hem-de halkara sergilerine yzygiderli gatnaşýar. Ol Türkmenistanyň Suratkeşler birleşiginiň daşary ýurtlarda gurnaýan sergilerine hem gatnaşyp, sungat muşdaklarynyň aýratyn söýgüsini gazanýar. Suratkeş Oraz Agabaýewiň şahsy döredijilik sergisi 10 gün dowam eder.
Çeşme: medeniyet.gov.tm
