29-njy awgustda Ýaponiýanyň Osaka şäherindäki “EKSPO-2025” Bütindünýä sergisiniň çäklerinde Türkmenistanyň milli pawilýonynda “Türkmenistan – dost-doganlygyň, myhmansöýerligiň mekany” atly ýurdumyzyň syýahatçylyk ulgamyna bagyşlanan halkara maslahaty geçirildi.
Bu maslahatyň işi Türkmenistanyň syýahatçylyk mümkinçiliklerini halkara derejesinde giňden ýaýmak, Ýaponiýa bilen hyzmatdaşlygy pugtalandyrmak hem-de syýahatçylyk ulgamyndaky döwlet we hususy düzümleriniň özara gatnaşyklaryny ösdürmekden ybarat boldy.
Çäräniň dowamynda gatnaşyjylar Türkmenistanyň syýahatçylyk ugrundaky döwlet syýasaty, onuň medeni hem-de taryhy mümkinçilikleri, häzirki wagtda amala aşyrylýan taslamalarynyň we halkara hyzmatdaşlygynyň mümkinçilikleri bilen tanyşdylar.
Maslahatyň dowamynda Türkmenistanyň Söwda we daşary ykdysady aragatnaşyklar ministrliginiň, Türkmenistanyň Medeniýet ministrliginiň hem-de ýurdumyzyň we Ýaponiýanyň syýahatçylyk agentlikleriniň wekilleri çykyş etdiler. Şeýle hem, maslahatyň çäklerinde Türkmenistanyň we Ýaponiýanyň syýahatçylyk edaralarynyň arasynda ikitaraplaýyn gepleşikler geçirilip, geljekki hyzmatdaşlygyň mümkinçilikleri ara alnyp maslahatlaşyldy.
Türkmenistanyň syýahatçylyk mümkinçiliklerini dünýä derejesinde giňden şöhlelendirmäge gönükdirilen bu çäre ýurdumyzyň halkara abraýynyň yzygiderli artýandygynyň nobatdaky beýany boldy.

Gyzykly bolup bilerЕЩЕ ОТ АВТОРА