PDF
Şu gün Ýagşygeldi Kakaýew adyndaky Halkara nebit we gaz uniwersitetinde Türkmenistanyň Bilim ministrligi we ÝUNESKO-nyň Bilim ulgamynda maglumat tehnologiýalar boýunça instituty bilen bilelikde “Durnukly ösüşiň maksatlaryna ýetmekde emeli aňyň mümkinçilikleriniň ähmiýeti” atly halkara ylmy-amaly maslahaty geçirildi. Maslahat Türkmenistanyň Başlangyjy boýunça Birleşen Milletler Guramasynyň Baş Assambleýasy tarapyndan 2025-nji ýylyň “Halkara parahatçylyk we ynanyşmak ýyly” diýilip yglan edilmegi, Türkmenistanyň Prezidentiniň Karary bilen tassyklanan “Türkmenistanda sanly bilim ulgamyny ösdürmegiň Konsepsiýasyny durmuşa geçirmegiň Meýilnamasyna” hem-de Türkmenistanyň hemişelik Bitaraplygynyň şanly 30 ýyllygy mynasybetli bilim ulgamy boýunça geçirilmeli çäreleriň Meýilnamasyna laýyklykda alnyp baryldy.
Halkara ylmy-amaly maslahatyň esasy maksady emeli aňy milli we halkara derejedäki bilim platformalaryna ornaşdyrmak, şeýle hem bu ugurda öňdebaryjy tejribeleri alyşmakdan ybarat boldy. Halkara ylmy-amaly maslahatda ÝUNESKO-nyň wekilleri, halkara bilermenleri, Türkmenistanyň Bilim ministrliginiň işgärleri, ýokary okuw mekdepleriniň alymlary we mugallymlary çykyş etdiler. Çykyş edýänler bilimi sanlylaşdyrmak, tehnologiýa ulgamlaryny üpjün etmek çäreleri geçirmek barada aýtdylar. Şeýle-de milli gözleg-barlag laboratoriýalary we merkezleri üçin halkara hyzmatdaşlyklary amala aşyrmak, mümkinçilikleri artdyrmak boýunça hyzmatdaşlygy ösdürmäge höweslendirilmelidigi bellenildi. Şunda Merkezi Aziýa ýurtlaryny jogapkär we öz içine alyjy emeli intellektual ulgamlarynyň ornaşdyrylmagyny goldamak we bu ulgamlaryň sebitde durnukly ösüş üçin täze mümkinçilikler döretmekdäki täsirine baha bermek üçin milli we sebit derejesinde degişli ölçegleri we mehanizmleri ösdürmegiň ähmiýeti nygtaldy.
Maslahata gatnaşyjylar bilim we okuw maksatnamalaryny ösdürmek, açyk “Emeli aň” modelleri we ulgamlary, okuw maglumatlary we hasaplamalar ýaly çeşmelere elýeterliligi giňeltmek, emeli aň modellerini taýýarlamagy we ösdürmegi ýeňilleşdirmek hem-de sanly ykdysadyýetde mikro, kiçi we orta kärhanalaryň gatnaşmagyny höweslendirmek meselelerine garaldy. Mundan başga-da, emeli aňyň ulanylyşynyň etiki taraplary hem-de innowasion bilim tehnologiýalary boýunça meseleleri ara alyp maslahatlaşyldy.
Halkara ylmy-amaly maslahatyň umumy mejlisiniň işinden soňra maslahat öz işini bölümlerde dowam etdirdi. Maslahatyň “Emeli aňyň inklýuziw we ýokary hilli bilim bermekde tutýan ýeri” atly 1-nji bölümi Türkmenistanyň Telekommunikasiýa we Informatika institutynda, “Bilimi we okuwy dolandyrmakda emeli aňyň getirýän üýtgetmeleri” atly 2-nji bölümi Magtymguly adyndaky Türkmen döwlet uniwersitetinde, “Mugallymlaryň we talyplaryň emeli aň boýunça başarnyklaryny ösdürmek” atly 3-nji we “Emeli aňyň şahsylaşdyrylan okuwlarda we bilim gurşawynda mümkinçilikleri we kynçylyklary” atly 4-nji bölümleri bolsa Ýagşygeldi Kakaýew adyndaky Halkara nebit we gaz uniwersitetinde üstünlikli geçirildi.
Utgaşykly görnüşdäki halkara ylmy-amaly maslahat bilim ulgamyna Emeli aň tehnologiýalaryny ornaşdyrmak boýunça tejribe alyşmak, sanly özgertmeler şertlerinde bilimi ösdürmegiň bilelikdäki strategiýalaryny işläp taýýarlamak üçin meýdança bolup, şahsylaşdyrylan okatmaklyga, tankydy pikirlenmäni ösdürmeklige, bilim maksatnamalarynyň häzirki döwrüň talaplaryna uýgunlaşmagyna aýratyn üns berildi.
Çärä gatnaşyjylar iň oňat halkara tejribeleri bilen tanyşmak, bar bolan kynçylyklary we mümkinçilikleri maslahatlaşmak, şeýle hem geljekde bilelikdäki taslamalary durmuşa geçirmek üçin hyzmatdaşlyk gatnaşyklaryny ýola goýmak mümkinçiliklerine eýe bolmak ugrunda pikir alyşdylar.
