Bezýe şäheriniň meri Rober Menar Rim imperiýasy döwrüniň şäheriniň, takmynan, miladynyň 30-njy ýyllaryndaky keşbini gaýtadan dikeltmäge gönükdirilen “Béziers Antique” taslamasyny hödürledi.
“Biz Isa Mesih dünýä inenden 30 ýyl soň bolşy ýaly, Bezýeni täzeden gurarys” diýip häkim “Ici Herault” neşiri bilen söhbetdeşlikde aýtdy. Taslamanyň 30 ýyl dowam etmegine we diňe gadymy Rim gurluşyk tärleriniň ulanylmagyna garaşylýar.
Menaryň bellemegine görä, gadymy mirasyň aýdyň yzlarynyň ýokdugyna garamazdan, şäherde heniz hem aýry-aýry yzlar saklanyp galypdyr. Taslama tapgyrlaýyn durmuşa geçiriler we gurluşyk meýdançalary hemmeler üçin açyk bolar.
Birinji tapgyr (2025-2030) amfiteatryň, ussahanalaryň we bilim ojaklarynyň gurluşygyny öz içine alýar. Ikinjisi (2031-2040) çuňňur medeni we taryhy desgalary öz içine alar. Jemleýji tapgyr, (2041-2055) halkara çäreleri bilen taslamanyň doly kämillik derejesine ýetmegini öz içine alýar.
Meýilnamany durmuşa geçirmek üçin gadymy hünärler, şol sanda daşy gaýtadan işlemek, mozaika döretmek we demirçilik işi boýunça 35 hünärmen işe alynar. Taslamanyň çykdajysy 13 million ýewro töweregi bolup, şolardan 3 milliony döwlet tarapyndan maliýeleşdirilýär. Bu taslama ýitip giden taryhy kökleri janlandyrmaga synanyşykdyr.

Gyzykly bolup bilerЕЩЕ ОТ АВТОРА