PDF
Gowaça ekişine guramaçylykly girişildi
Türkmenistanyň Agrar partiýasynyň Çärjew etrap komitetiniň we Türkmenistanyň Tebigaty Goramak jemgyýetiniň Lebap welaýat bölüminiň bilelikde guramaklarynda Çärjew etrabynyň Lebap daýhan birleşiginde “Her bir tohumyň müň bolsun!” ady bilen çäre geçirildi. Çärä etrap oba hojalyk ulgamyndan hünärmenler, ýer eýeleri, kärendeçiler, dünýä ülňülerine laýyk gelýän kämil oba hojalyk tehnikalaryna erk edýän mehanizatorlar we oba adamlary gatnaşdylar.
Bahar paslynyň gelmegi bilen, ýere ýyly gidip, toprak bilen bagry badaşan ýer eýeleri ekin meýdanlaryna çykyp, ýerleri mineral dökünler bilen gurplandyryp, olary taba getirip, gowaça ekişine girişdiler. Türkmen Halkynyň Milli Lideri Gahryman Arkadagymyzyň, Arkadagly Gahryman Serdarymyzyň başda durmaklarynda uly goldaw berilýär. Ýerli toprak we howa şertlerinde bol hasyl getirýän naýbaşy tohumlaryň mineral dökünler bilen üpjün edilmegi babadaýhanlaryň öz üstüne alana şertnamalaýyn borçnamalaryny üstünlikli berjaý etmeklerine ýardam edýär.
Çärede Türkmenistanyň Agrar partiýasynyň Çärjew etrap komitetiniň işgärleri, Türkmenistanyň Tebigaty Goramak jemgyýetiniň Lebap welaýat bölüminiň hünärmenleri eden çykyşlarynda gowaçadan bol hasyl almak ugrunda alnyp barylýan işleriň sakasynda duran Gahryman Arkadagymyza, Arkadagly Gahryman Serdarymyza çäksiz hoşallyklaryny bildirdiler. Babadaýhanlarymyz ýylyň-ýylyna ýerden ýokary hasyl alýarlar. Watan harmanyna tabşyrylýan oba hojalyk önümleri bu günki gün bazarlarda önüm bolçulygyny döredip, ildeşlerimiziň toý saçaklaryny bezeýär.
Şu günler gowaça ekişi uly depginler bilen gyzgalaňly alnyp barylýar. Daýhanlarymyzyň netijeli işlemekleri ugrunda döredilen şertler bolsa olaryň önjeýli işlemeklerine itergi berýär.
Çäräniň barşynda pagtaçy kärendeçilerimiziň ençemesi Türkmenistanyň Agrar Partiýasynyň Çärjew etrap komiteti tarapyndan ýörite taýýarlanylan sowgatlara mynasyp boldular.
Çäre “Garaşsyz, Baky Bitarap Türkmenistan – bedew batly at-myradyň mekany” ýylynda gowaça ekişine girişen babadaýhanlarymyzyň möwsümi guramaçylykly geçirmeklerine ýardam berer.
Nasiba Durdybaýewa, Türkmenistanyň Agrar partiýasynyň Çärjew etrap komiteti buhgalteri.
