PDF
“TPV Technology Group” kompaniýasy dünýäde ilkinji gezek iki tarapy hem ekranly bolan telewizory hödürledi. Bu barada “TechRadar” neşiri habar berdi.
GP TV enjamynyň her tarapynda 48 dýuýmlyk ekran ýerleşýär. Displeýler 4K durulygyndaky OLED durulygyna eýedir. Modeliň gaýtadan işlenen materiallardan ýasalan metal aýajyklary bar we “Dolby Atmos” ulgamyny goldaýar.
Kompaniýa GP TV-niň bir wagtyň özünde birnäçe ulanyjynyň – mysal üçin, kompýuter oýunçylarynyň ulanmagy üçin niýetlenendigini düşündirdi. Şeýle-de, bu model döwlet pudagy we hökümet edaralary üçin niýetlenendir.
Žurnalistler enjamy şeýle häsiýetlendirdiler: «Monitorlaryň ýa-da telewizorlaryň köpüsiniň diwaryň ýanynda ýa-da stoluň üstünde durýandygy sebäpli, arka tarapda displeýiň bolmagy, esasan, peýdasyz ýaly görünýär, şonuň üçin bu gurluş üýtgeşik bolup görünýär». Awtorlaryň aýtmagyna görä, tehniki täzeliklere garamazdan, iki taraply gurluşyň iş ýüzünde ulanylyşy barada şübheler bar. GP TV-niň bahasy we satuwa çykaryljak möhletleri aýdyňlaşdyrylmady, ýöne “TPV Technology Group” bu telewizoryň premýum-klas önümidigini nygtaýar.
Ýanwar aýynyň ahyrynda “Counterpoint Research”-iň bilermenleri ýakyn geljekde “Samsung” kompaniýasynyň dünýäde telewizor öndürýän esasy öndüriji bolmagyny bes etjekdigini çakladylar. Kompaniýa bu adyny Hytaýyň TCL firmasyna berip biler.
