PDF
Lebap welaýat kitaphanasynda hormatly Prezidentimiz Arkadagly Gahryman Serdarymyzyň jöwher paýhasyndan kemal tapyp, ellerimize gelip gowuşan “Türkmenistanyň Bitaraplygy – parahatçylygyň we ynanyşmagyň aýdyň ýoly” atly täze kitabynyň tanyşdyrylyş dabarasy geçirildi. Şanly dabaranyň guraýjysy bolup çykyş edýän Türkmenistanyň tebigaty Goramak jemgyýetiniň Lebap welaýat bölüminiň, Lebap welaýat kitaphanasynyň hünärmenleri kitap sergisini guradylar. Dabara Türkmenistanyň Tebigaty Goramak jemgyýetiniň Lebap welaýat bölüminiň hünärmenleri, Lebap welaýat kitaphanasynda kitaphanaçylar, Lebap welaýat taryhy we ülkäni öwreniş muzeýiniň hünärmenleri, Türkmenabat şäheriniň jemgyýetçilik guramalarynyň işgärleri, ýokary we orta hünär okuw mekdepleriniň talyp ýaşlary, professor-mugallymlary, orta okuw mekdepleriniň okuwçylary, dili senaly gojalarymyz şeýle-de şäheriň ýaşaýjylary gatnaşdylar.
Türkmenistanyň Tebigaty Goramak jemgyýetiniň Lebap welaýat bölüminiň hünärmeni Maýsa Berdiýewa, Lebap welaýat taryhy we ülkäni öwreniş muzeýiniň uly ylymy işgäri Ogulgerek Agajanowa, Lebap welaýat kitaphanasynyň bölüm müdiri Akjemal Dosyýewa dagynyň eden çykyşlarynda “Türkmenistanyň Bitaraplygy- Parahatçylygyň we ynanyşmagyň aýdyň ýoly” kitabynyň many mazmuny, terbiýeçilik ähmiýeti dogrusynda gürrüň etdiler. Kitabyň her babynda öňe sürülýän düşünjeleriň many mazmunlary dogrusynda giňişleýin durulup geçilip, sowal jogaplar alşyldy. Many-mazmuna baý bolan bu kitabyň ösüp gelýän ýaş nesilimizi Watançylyk ruhunda terbiýelemekde aýratyn ähmiýete eýe boljakdygy dogrusunda buýsanç bilen bellenildi.
Durmuş ummanyna näçe çuň aralaşdygymyzça Gahryman Arkadagymyzyň Arkadagly Gahryman Serdarymyzyň halkymyza peşgeş berýän kitaplaryna bolan islegimiz artyp, ähmiýetine buýsanyp ýaşaýan ildeşlerimize ýol görkeziji şam çyrag bolup hyzmat edýär.
Dabaranyň esasy maksady Arkadagly Gahryman Serdarymyzyň “ Türkmenistanyň Bitaraplygy – parahatçylygyň we ynanyşmagyň aýdyň ýoly” kitabynyň geçmiş taryhymyzyň asyl köklerini dikeltmekde, ýaş nesilimizi watançylyk ruhunda terbiýelemekde bimöçber ähmiýetini wagyz etmekden ybarat boldy.
Arkadagly Gahryman Serdarymyzyň galamlarynyň ýiti bolup, peşgeş berýän kitaplarynyň höwri köp bolsun.
Pursatdan peýdalanyp Türkmen Halkynyň Milli Lideri Gahryman Arkadagymyzyň, Arkadagly Gahryman Serdarymyzyň janlary sag, ömürleri uzak bolsun!
Merdan Jumaýew, Türkmenistanyň Tebigaty Goramak jemgyýetiniň Lebap welaýat bölümiň başlygynyň orunbasary.
