PDF
Angliýanyň Liga Kubogy (EFL Cup) ýaryşynda 1/8 finalyň duşuşyklary geçirildi. Tapgyryň iň geň galdyryjy netijesi “Anfield” stadionynda hasaba alyndy. Ýerli “Liwerpul” ýurduň çägindäki şowsuz ýörişini dowam etdirip, öz meýdançasynda “Kristal Palasdan” 3-0 hasabynda asgyn geldi. London şäheriniň wekilini çärýek finala çykaran gollary Sarr (41, 45) bilen Ýeremi Pino (88) geçirdi.
“Arsenal” öz meýdançasynda “Braýtony” (Nwaneri 57, Saka 76), “Nýukasl” hem “Tottenhamy” (Şer 24, Woltemade 50) 2-0 hasabynda utdy.
“Mançester Siti” myhmançylykda “Swansi Siti” toparyndan ýer eýeleriniň öňe geçendigine garamazdan, Doku (39), Marmuş (77) hem-de Şerkiniň (90+4) gollary bilen 3-1 hasabynda üstün çykdy.
7 goluň geçirilen oýnunda “Çelsi” myhmançylykda “Wulwerhemptony” 4-3 hasabynda ýeňdi. “Çelsiniň” geçiren gollarynyň 4-sini hem ýaş futbolçylar öz atlaryna ýazdyrdylar (Arokodare 48, Wolfe 73, 90+1 – Santos 5, Jorj 15, Estewao 41, Gittens 89).
“Brentford” topary 4-nji liganyň wekili “Grimsbi Tawn” toparynyň derwezesinden jogapsyz 5 gol geçirdi. Gollary Ýensen (22), Lewis-Potter (26), Nelson (43), Karwalýo (54 p) hem-de Kollins (75) derwezä girizdi.
“Fulham” myhmançylykda “Wikom Wanderers” topary bilen esasy wagty 1-1 hasabynda deňlikde tamamlanan oýunda 11 metrlik jerime urgularyň netijesinde ýeňiş gazandy (4-5).
2-nji ligada çykyş edýän “Reksam” toparyny 2-1 hasabynda ýeňen “Kardiff Siti” topary çärýek finaldaky “Premier Liganyň” kluby bolmadyk ýeke-täk topar boldy.
Çärýek finalda “Arsenal” – “Kristal Palas”, “Kardiff Siti” – “Çelsi”, “Mançester Siti” – “Brentford”, “Nýukasl” – “Fulham” duşuşyklary geçiriler. Çärýek finalyň oýunlary 16-17-nji dekabrda oýnalar.
