Rob Ýetteniň ýolbaşçylygyndaky çepçi liberal partiýa “Demokratlar 66” (D66) 22-nji oktýabrda Niderlandlarda geçirilen parlament saýlawlarynda öňde barýar we Gert Wildersiň aşa sagçy “Azatlyk partiýasyndan” 1 ses bilen öňe saýlanyp, ýeňiş gazandy.
Şeýlelikde, wagtyndan öň geçirilen saýlawlarda “D66” partiýasy 150 orunlyk parlamentiň aşaky palatasyndan 27 orun, “Azatlyk partiýasy” bolsa 26 orun eýeledi. Sagçy liberal “Azatlyk we demokratiýa üçin halk partiýasy” 22 orun bilen üçünji orny eýeledi. Bu netije liberallar üçin ýeňiş hasaplansa-da, “Azatlyk partiýasy” üçin ýeňlişi aňladýar: çünki öňki saýlawlarda olar 37 orun gazanypdylar. Öňki howa meseleleri boýunça Ýewropa komissary Frans Timmermansyň ýolbaşçylygyndaky “Zähmet partiýasy” we Ýaşyl çepçiler koalisiýasy 20 orun bilen diňe dördünji orny eýeledi. Timmermans eýýäm bu bileleşigiň lideri wezipesinden çekilýändigini mälim etdi.
Beýleki syýasy partiýalar “Azatlyk partiýasy” bilen hyzmatdaşlygy ret edendikleri üçin, “D66”-nyň 38 ýaşly lideri Rob Ýetten Niderlandlaryň taryhynda iň ýaş Premýer-ministr bolup biler. Häzir Patyşalyk birnäçe aýlap dowam edip biljek çylşyrymly hökümet gurmak prosesi bilen ýüzbe-ýüz bolýar.
Koalisiýanyň döredilmegi öňde we bu gezek esasy syýasy güýçleriň Wildersiň “Azatlyk partiýasy” bilen iş salyşjakdygy gümana. “Azatlyk partiýasy” 2023-nji ýyldaky saýlawlarda ynamly ýeňiş gazandy we koalisiýa döretmek boýunça ýedi aýlap gepleşik geçirdi. Netijede, hökümet bir ýyldan hem az wagtlap işledi we Wilders immigrasiýa meseleleri boýunça düşünişmezlikler sebäpli koalisiýadan çykýandygyny mälim etdi.
Iýun aýynda koalisiýa hyzmatdaşlarynyň immigrasiýa düzgünlerini güýçlendirmek baradaky teklipleri kabul edilmändigi sebäpli “Azatlyk partiýasy” dolandyryjy koalisiýadan çykandan soň Gert Wilders tarapyndan gyssagly saýlawlar mälim edildi. Bu saýlawlarda Wilders Ýewropa Bileleşiginde iň berk bosgun düzgünlerini ornaşdyrmak baradaky wadasyny gaýtalapdy.

Gyzykly bolup bilerЕЩЕ ОТ АВТОРА