Şu gün 34-nji möwsüme badalga berler

Şu gün Russiýanyň çempionaty “Premýer Liganyň” 34-nji möwsümine badalga berler. Täze möwsümiň ilkinji duşuşygy Moskwanyň “Dinamo” topary bilen Kaliningradyň “Baltika” toparynyň arasyndaky oýun bolar.

Tälimçileriň 9-sy ýerli hünärmenler

Täze möwsüme 5 topar täze tälimçi bilen başlaýar. Şolaryň iň esasy 2-si Moskwanyň klublary bolup, SSKA Marko Nikoliçi ugradyp, ornuna şweýsariýaly Fabio Çelestinini wezipä belledi. Paýtagtyň “Dinamosy” bolsa Russiýanyň milli ýygyndysynyň hem tälimçisi bolan Waleriý Karpini toparyň tälimçisi edip goýdy. Çempionatdaky 16 klubuň 9-syna ýerli hünärmenler tälim berse, galan 7-si legioner tälimçiler bolar. Ispaniýadan 2, Serbiýadyr Şweýsariýadan, Bosniýadan, Belarusdan hem-de Täjigistan 1 tälimçi toparlary türgenleşdirer.

Esasy faworit “Zenit”

Çempionatda geçen möwsüm täze çempion peýda bolupdy. Soňky ýyllardaky şowly ýörişiniň üstüni çempionlyk bilen ýetiren “Krasnodar” taryhy başarnyk görkezipdi. 17 ýyllyk taryhynda ilkinji çempionlygyny gazanan klub RPL-de çempion bolan 7-nji topar hökmünde hasaba alnypdy. Şu möwsümde “Krasnodara” çempionlygyny goramak ýeňil düşmese gerek. Sebäbi täze möwsümde 100 ýyllyk ýubileý ýylynda çempionlygy “Krasnodara” aldyran “Zenit” altyn medalyň iň esasy dalaşgäri hasaplanýar. Şeýle-de, “Krasnodar”, Moskwanyň “Spartak”, SSKA, “Dinamo” klublary-da çempionlygyň beýleki dalaşgärleri diýlip bellenilýär.

“Himki” topary ýapyldy

Çempionatyň täze toparlary “Baltika” bilen “Soçi” toparlary bolup, geçen möwsümde iň soňky orny eýelän Fakel topary aşaky ligada oýnar. Şeýle-de, “Himki” çempionaty 12-nji orunda tamamlasa-da, ýokary ligada çykyş etmek üçin maliýe babatda ýetmezçilik sebäpli toparyň ýolbaşçylary tarapyndan klub ýatyryldy.

Transferlere seredenimizde, Zenit” topary Braziliýanyň “Flamengo” klubundan ýyldyz oýunçy Žersony düzümine goşdy. Şol sanda “Krasnodar” hem Žubal, Furtado, Augusto ýaly Ýewropada tejribesi bolan braziliýaly oýunçylar bilen düzümini güýçlendirdi.

Ilkinji 10 tapgyrda esasy duşuşyklar

Çempion “Krasnodar” möwsüme Nižniý Nowgorodda “Pari” topary bilen, “Zenit” öz meýdançasynda “Rostow” duşuşygy bilen badalga berer. 2-nji tapgyrdaky “Krasnodar” – “Lokomotiw”, 3-nji tapgyrdaky “Zenit” – SSKA, “Krasnodar” – “Dinamo”, 4-nji tapgyrdaky “Lokomotiw” – “Spartak”, 5-nji tapgyrdaky “Spartak” – “Zenit”, 7-nji tapgyrdaky SSKA – “Krasnodar”, 8-nji tapgyrdaky “Dinamo” – “Spartak”, 9-njy tapgyrdaky “Krasnodar” – “Zenit” duşuşyklaryny çempionatyň muşdaklarynyň eýýämden sabyrsyzlyk bilen garaşýan oýunlary hökmünde görkezmek bolar.  30 aýlawdan ybarat bolan çempionat geljek ýylyň maý aýynda tamamlanar. Çempionatda dekabryň ilkinji hepdesinde geljek ýylyň mart aýyna çenli arakesme yglan ediler.