“The African Exponent”: has ösen infrastrukturaly Afrika ýurtlary

Afrika yklymynda ykdysady seljeriş we reýting boýunça ýöriteleşen “The African Exponent” portaly infrastrukturany ösdürmekde möhüm öňegidişlik gazanan 10 Afrika ýurtlarynyň sanawyny çap etdi.
Sanawyň başyny Seýşel adalary çekýär. Ýurt özüniň syýahatçylyk babatda özüne çekijiligi we ilkinji nobatda, balykçylyk pudagyna daýanýan ykdysadyýeti bilen tanalýar. Müsür ikinji, Liwiýa üçünji orny eýeledi. Liwiýa ozalky taslamalary janlandyrdy we halkara hyzmatdaşlygy arkaly täze taslamalary durmuşa geçirdi.
Sanawa Demirgazyk Afrika sebitinden bäş ýurt girdi: Marokko, Müsür, Alžir, Tunis we Liwiýa ýaly ýurtlarda şäher meýilnamalaşdyrylyşy we strategik halkara hyzmatdaşlygy infrastrukturanyň möhüm ösüşine sebäp boldy.
Marokko Patyşalygy özüniň infrastruktura ösüşini çaltlandyrmak üçin Hytaý we Koreýa Respublikasy ýaly Aziýa ýurtlary bilen hyzmatdaşlygyndan peýdalanan öňdebaryjy Afrika ýurtlarynyň biridir. Bu aralykda, Marokkanyň iri taslamalary sebitiň ykdysady merkezi hökmünde, esasan hem, deňiz ulaglary, demir ýollar we arassa energiýa ugurlarynda ýurduň ornuny berkitmäge goşant goşdy. Hasabatda Marokkanyň käbir möhüm taslamalaryna, şol sanda Tanžer bilen Kasablankanyň arasyndaky ýokary tizlikli demirýol liniýasyna üns çekilýär. Bu demir ýol liniýasy yklymdaky ilkinji özboluşly ugurdyr we halkara hyzmatdaşlygy arkaly işlenip düzülendir. Ortaýer deňziniň iň öňdebaryjy portlaryndan biri bolan “Tangier Med” senagat port toplumy, Uuarzazate şäherindäki gaýtadan dikeldilýän energiýa desgalary hem nazara alyndy.
Bu synda “geografiýa infrastrukturany ösdürmekde aýratyn ähmiýete eýedir” diýlip bellenip geçilýär. Çünki adalarda ýa-da Ortaýer deňziniň kenarlarynda ýerleşýän ýurtlaryň köpüsi has amatly ýerleri eýeläp, sanawda öňdäki orny eýeleýär.
“Gowy infrastruktura islendik ýurduň ösüşiniň esasy özenidir. Adamlar ýurduň ösüşini kesgitlemek üçin köplenç ýollara, elektrik toguna, howa menzillerine we suw ulgamlaryna seredýärler. Şeýle-de bolsa, infrastruktura bir ýurduň maliýe serişdelerini we baýlyklaryny nähili dolandyrýandygyny we raýatlaryna näderejede goldaw berýändigini görkezýär” diýip, “African Exponent” belleýär.