PDF
Futbolyň hojaýny FIFA tarapyndan berilýän The Best baýraklarynyň bu ýylky dalaşgärleri mälim edildi. Erkekleriň arasynda ýylyň iň gowy futbolçysy baýragyna dalaşgär görkezilen 11 futbolçynyň 4-si Çempionlar Ligasynyň ýeňijisi PSŽ-niň futbolçylary bolup, olar “Altyn top” baýragyny gazanan Usman Dembele, Aşrah Hakimi, Nunu Mendeş hem-de Witinýa dagydyr. “Barselonadan” hem 3 futbolçy – Pedri, Rafinýa we Lamin Ýamal dalaşgär görkezildi. “Bawariýanyň” iňlis hüjümçisi Harri Keýn bilen “Premier Ligadan” “Liwerpulyň” müsürli ýyldyzy Mohamed Salah hem-de “Çelsiniň” ýaş oýunçysy Koul Palmer “The Best FIFA” baýragyna dalaşgärlige hödürlendi.
Sanawa alnan futbolçylaryň 2024-nji ýylyň 11-nji awgustyndan 2025-nji ýylyň 2-nji awgustyna çenli görkezen başarnyklary göz öňünde tutuldy.
Şeýle-de, erkekleriň arasynda ýylyň iň gowy tälimçisi baýragyna-da 7 hünärmen dalaşgär görkezildi: Arne Slot, Enzo Mareska, Hansi Flik , Robert Martines, Mikel Arteta, Luiz Enrike hem-de Hawier Agirre.
Bulardan başga-da iň gowy goragçy, iň gowy derwezeçi, iň gowy hüjümçi baýraklarynyň, şol sanda zenanlaryň arasynda-da iň gowy futbolçy, tälimçi, derwezeçi, goragçy, hüjümçi ýaly ugurlaryň dalaşgärleri-de mälim edildi.
Iň gowy erkek futbolçy baýragynyň dalaşgärleri:
Usman Dembele (Fransiýa) – PSŽ
Aşraf Hakimi (Marokko) PSŽ
Harri Keýn (Angliýa) – Bawariýa
Kilian Mbappe (Fransiýa) – Real Madrid
Nunu Mendeş (Portugaliýa) – PSŽ
Koul Palmer (Angliýa) – Çelsi
Pedri (Ispaniýa) – Barselona
Rafinýa (Braziliýa) – Barselona
Mohamed Salah (Müsür) – Liwerpul
Witinýa (Portugaliýa) – PSŽ
Lamin Ýamal (Ispaniýa) – Barselona
Iň gowy erkek tälimçi baýragynyň dalaşgärleri:
Arne Slot – Liwerpul
Enzo Mareska – Çelsi
Hansi Flik – Barselona
Robert Martines – Portugaliýanyň ýygyndysy
Mikel Arteta – Arsenal
Luiz Enrike – PSŽ
Hawier Agirre – Meksikanyň ýygyndysy
