PDF
Tokio uzak aralykdan işi we dynç alşy utgaşdyrmak üçin iň oňat şäherleriň sanawynda birinji orny eýeledi. Bu barada Şweýsariýanyň “International Workplace Group” (IWG) topary tarapyndan taýýarlanan reýtingde aýdylýar.
2025-nji ýylda Ýaponiýanyň paýtagty ýokary internet tizligi, ösen ulag infrastrukturasy, howpsuzlyk, medeni durmuşynyň dürli-dürliligi we uzak aralykdan işleýän daşary ýurtly hünärmenler üçin ýakynda girizilen wiza sebäpli birinji orny eýeledi, diýlip, IWG-niň hasabatynda bellenilýär.
Tokionyň goşmaça artykmaçlygy, onuň daglara, plýažlara we milli seýilgählere ýakynlygydyr. IWG-iň pikiriçe, bu şäher tebigata çykmak mümkinçiligine eýe bolup, şäher gurşawynda işlemegi halaýanlar üçin amatlydyr.
IWG-de reýting düzülende uzakdan işlemek üçin ýaşaýyş jaý we infrastrukturanyň elýeterliligini, jemgyýetçilik ulagynyň ösüş derejesini, howa şertlerini, ýerli aşhanalaryň özüne çekijiligini we medeni dynç alyş mümkinçiliklerini öz içine alýan köp ölçegleri göz öňünde tutdy.
Bu ýyl IWG ilkinji gezek daşary ýurtlulara bir ýurtda uzakdan işlemäge we ýaşamaga mümkinçilik berýän wizalaryň elýeterliligine we bahasyna hem seretdi.
IWG-iň ilkinji onlugyna Tokiodan başga-da, Rio-de-Žaneýro, Budapeşt, Seul, Barselona, Pekin, Lissabon, Rim, Pariž we Walletta girdi.
“Gibrid meýilnamalaryň ornaşdyrylmagy we bulut tehnologiýalarynyň ösmegi bilen adamlar özlerine laýyk gelýän iş ýerlerini we wagtyny saýlamak erkinligine eýe boldular” diýip, «CEO of International Workplace Group» toparynyň esaslandyryjysy we baş direktory Mark Dikson belläp geçdi.
“Bu tendensiýa dowam etdiriler” diýip, Dikson sözüniň üstüne goşdy. Onuň sözlerine görä, işgärlere uzakdan işlemäge mümkinçilik bermek, esasan hem, tomus aýlarynda, diňe bir iş we şahsy durmuşyň balansyny gowulandyrmak we argynlygyň öňüni almak bilen çäklenmän, eýsem öndürijiligi hem ep-esli ýokarlandyrýar.
