Şu gün hormatly Prezidentimiz Serdar Berdimuhamedow Şanhaý Hyzmatdaşlyk Guramasyna agza döwletleriň Baştutanlarynyň Geňeşine hormatly myhman hökmünde gatnaşmak maksady bilen, Özbegistanyň Samarkant şäherine geldi. Munuň özi hormatly Prezidentimiziň iň ýokary döwlet wezipesinde bu dostlukly ýurda amala aşyrýan ikinji saparydyr.

Irden döwlet Baştutanymyz Serdar Berdimuhamedowyň uçary Samarkant şäheriniň Halkara howa menzilinde gondy. Bu ýerde sammite gatnaşyjy ýurtlaryň Döwlet baýdaklary galdyryldy, Hormat garawuly nyzama düzüldi. Howa menzilinde hormatly Prezidentimizi Özbegistan Respublikasynyň Premýer-ministri Abdulla Aripow we beýleki resmi adamlar, şol sanda türkmen wekiliýetiniň agzalary garşyladylar.

Iki günlük iş saparynyň birinji gününiň maksatnamasynda döwlet Baştutanymyzyň Samarkant sammitine gatnaşýan käbir ýurtlaryň Liderleri hem-de Şanhaý Hyzmatdaşlyk Guramasynyň Baş sekretary bilen ikitaraplaýyn duşuşyklary göz öňünde tutulýar. Şeýle-de hormatly Prezidentimiz Özbegistanyň ilkinji Prezidenti Yslam Karimowy hatyralap, onuň mawzoleýine gül dessesini goýar. Günüň ikinji ýarymynda wekiliýet Baştutanlary bilelikde Hormatly myhmanlar seýilgähinde nahal oturdyp, «Baky şäher» medeni-etnografik toplumyna baryp görerler.

Ýeri gelende bellesek, 2001-nji ýylyň 15-nji iýunynda döredilen Şanhaý Hyzmatdaşlyk Guramasy hemişelik esasda hereket edýän halkara hökümetara guramadyr. Häzirki wagtda dünýäniň 8 döwleti ― Hindistan, Gazagystan, Hytaý, Gyrgyzystan, Pakistan, Russiýa, Täjigistan we Özbegistan onuň agzalygyna girýär. Käbir ýurtlar bolsa onuň işine synçy, dialog boýunça hyzmatdaş derejesinde gatnaşýar. Türkmenistan bu guramanyň sammitlerine hormatly myhman hökmünde çagyrylýar. Samarkant sammitinde köptaraplaýyn hyzmatdaşlygyň ösüşiniň häzirki ýagdaýyna we geljekki mümkinçiliklerine garamak, ŞHG-niň häzirki döwürdäki işiniň gerimini giňeltmek boýunça ileri tutulýan ugurlarydyr amaly çäreleri kesgitlemek göz öňünde tutulýar. Sammitiň jemleri boýunça 30-dan gowrak resminamanyň, şol sanda Samarkant Jarnamasynyň kabul edilmegine garaşylýar.

ЭТО МОЖЕТ БЫТЬ ИНТЕРЕСНОЕЩЕ ОТ АВТОРА