Ýaponiýada daşary ýurtly işçileriň sany täze iň ýokary derejä ýetip, geçen ýylyň oktýabr aýynyň ahyryndaky maglumatlara görä 2,57 millionda geçdi we ýurtda işçi güýjüniň ýetmezçiligi sebäpli yzygiderli 13 ýyldan bäri rekord goýmagyny dowam etdirýär.
Ýapon metbugatynyň habar bermegine görä, işgärleriň umumy sany 2 million 571 müňden geçdi, bu bolsa öňki ýyl bilen deňeşdirilende, 11,7% köpdür. Şol bir wagtyň özünde, iň uly paý wýetnamly işçilere degişlidir.
Bu maglumatlar, 8-nji fewralda geçiriljek Wekiller palatasyna saýlawlara taýýarlyk görlüşiniň daşary ýurt raýatlaryny jemgyýete has gowy uýgunlaşdyrmak, meselem, olary kabul etmegiň düzgünlerini berkitmek we durmuş agzybirligini ýokarlandyrmak ýaly meselelere ünsi çekýän wagtynda peýda boldy.
Daşary ýurt raýatlarynyň zähmet çekýän iş ýerleriniň sany hem rekord derejä — 371 müň 215-e ýetdi, bu öňki ýyldaky görkezijiden 8,5% köpdür. Ýaponiýanyň Saglygy goraýyş, zähmet we durmuş üpjünçiligi ministrliginiň maglumatlaryna görä, işgärleriniň sany 30-dan az bolan kiçi kärhanalara umumy sanyň 63,1%-i düşýär.
Gaýtadan işleýän senagat pudagy 635 075 daşary ýurtly işgäri bilen beýleki pudaklardan öňe saýlandy we umumy sanyň 24,7%-ini emele getirdi, ondan soňra iýmit eltip bermek hyzmatyndan başga hyzmatlar pudagy (391 946 adam) gelýär. Saglygy goraýyş we durmuş üpjünçiligi sektorynda, şol sanda uzak möhletleýin ideg hyzmatlarynda öňki ýyl bilen deňeşdirilende 25,6% bilen iň uly ösüş hasaba alyndy.
Işçi güýji ýetmezçiligini başdan geçirýän pudaklarda daşary ýurtdan gelen adamlara işlemäge rugsat berýän ýörite hünärli işçi wizasy bolanlaryň sany 38,3% artyp, 286 225-e ýetdi.
Wýetnamly işçiler 605 müň 906 ýa-da umumy sanyň 23,6%-ini emele getirdi. Olardan soňra hytaýlylar (431 949 adam ýa-da 16,8%) we filippinli (260 869 adam ýa-da 10,1%) işçiler gelýär.

Gyzykly bolup bilerЕЩЕ ОТ АВТОРА