PDF
Marokkoda dowam edýän 35-nji Afrika Milletler Kubogy ýaryşynda toparçadaky duşuşyklar tamamlandy. Netijede, 1/8 finala çykan toparlaryň ählisi belli boldy.
“A” toparçada Marokkonyň ýygyndysy 2-nji oýnunda Mali bilen deňme-deň oýnap, 3-nji duşuşygynda Zambiýanyň ýygyndysynyň derwezesinden jogapsyz 3 gol geçirdi. Marokkonyň toparçada geçiren 6 goluny 2 futbolçy öz adyna ýazdyryp, Brahim Diaz her oýunda tapawutlanmagy başardy. 1-3-nji duşuşyklarda tapawutlanan El-Kaabi geçiren gollarynyň 2-sini üstaşar ýagdaýda derwezä girizdi. Toparçada Maliniň ýygyndysy 3 duşuşygynda-da deňme-deň oýnap, 2-nji orny eýeledi.
“B” toparçada Müsüriň ýygyndysy 2-nji duşuşygynda Günorta Afrikanyň Mohamed Salahyň 45-nji minutda 11 metrlik jerime urgusyndan salan goly esasynda üstün çykyp, 1/8 finala adyny ýazdyran ilkinji topar boldy. Müsürliler 3-nji duşuşygynda Angola bilen golsuz deňme-deň oýnady. Çekeleşikli geçen oýunda Zimbabweniň ýygyndysyny 3-2 hasabynda ýeňen Günorta Afrikanyň milli topary toparçada 2-nji orna mynasyp boldy.
“C” toparçada Nigeriýanyň ýygyndysy 3 duşuşygynda-da ýeňiş gazanan 2 toparyň biri bolup, olar 2-nji duşuşygynda Tunisi 3-2, 3-nji duşuşygynda Ugandany 3-1 hasaplar bilen utdy. Toparçada Tunisiň ýygyndysy 4 utuk toplap, 2-nji orna mynasyp boldy.
“D” toparçada Senegalyň ýygyndysy Kongo DR bilen 1-1 hasabynda deňme-deň oýnap, olara beninli futbolçylary utmak kyn düşmedi. 3-0 hasabynda ýeňiş gazanan günbatar afrikalylaryň gollaryny Sek, Diallo hem-de Ndiaýe öz atlaryna ýazdyrdylar. Kongo DR-niň ýygyndysy bolsa Botswanany Mbuku we Gael Kakutanyň (2) gollary bilen 3-0 hasabynda utup, toparçada Senegal ýaly 7 utuk toplamagy başardy.
“E” toparçada Alžiriň ýygyndysy Burkina Fasonyň ýygyndysyny Mahreziň 23-nji minutda 11 metrlik jerime urgusyndan geçiren ýeke-täk goly esasynda ýeňdi. Alžiriň ýygyndysy 3-nji duşuşygynda Ekwator Gwineýasyny 3-1 hasabynda ýeňip, Nigeriýadan soň 9 utuk toplan 2-nji milli topar boldy.
“F” toparçada iki güýçli toparyň Kot-d’Iwuar bilen Kamerunyň milli ýygyndylaryň arasyndaky oýunda ýeňiş gazanan bolmady. Ýöne olaryň 2-si hem 3-nji duşuşyklarynda ýeňiş gazanmagy başardy. Kot-d’Iwuar garşydaşy Gabonyň 2-0 hasabynda öňde barýandygyna garamazdan, 3-2 hasabynda ýeňiş gazanmagyň hötdesinden geldi. Kanga bilen Buanganyň gollaryna soňky çempion Kot-d’Iwuaryň ýygyndysyndan Krasso, Gessand hem-de 90-njy minutdan soň Ture jogap berdi. Gabonyň ýygyndysy bu oýundan öň Mozambikden hem 3-2 hasabynda ýeňlipdi. Kamerunyň ýygyndysy hem Mozambigiň milli toparyny garşydaşynyň ilkinji bolup hasaby açandygyna garamazdan, Nene hem-de Kofaneniň gollary bilen 2-1 hasabynda utmagy başardy.
Toparçalardaky oýunlardan soň “A” toparçada Marokko bilen Mali, “B” toparçada Müsür bilen Günorta Afrika, “C” toparçada Nigeriýa bilen Tunis, “D” toparçada Senegal bilen Kongo DR, “E” toparçada Alžir bilen Burkina Faso, “F” toparçada Kot-d’Iwuar bilen Kamerun 1-2-nji orunlary eýelediler. 3-nji ýeri eýelänleriň arasyndan iň gowy 4-si ýaryşy dowam etdirip, 3 utuk gazanan Beniniň (“D”), Sudanyň (“E”) hem-de Mozambigiň (“F”) ýygyndylary 1/8 finala çykdy. Olaryň hataryna 3 sany 2 utukly toparyň arasyndan 3 gol geçirip, 4 gol geçirden Tanzaniýanyň ýygyndysy (“C”) goşuldy.
1/8 finalyň duşuşyklary 3-6-njy ýanwar aralygynda geçiriler. Ýer eýeleri Marokkonyň ýygyndysy Tanzaniýa bilen duşuşsa, Nigeriýanyň ýygyndysy Mozambik bilen güýç synanyşar. Müsüriň garşydaşy Benin bolup, tapgyryň iň öňe saýlanýan oýnunda Günorta Afrika bilen Kamerunyň ýygyndylary duşuşarlar. Şol sanda Alžir bilen Kongo DR-niň ýygyndylarynyň arasyndaky duşuşyk hem tapgyryň esasy oýunlarynyň biri bolar.
Ýeňiş gazanan toparlar 9-10-njy ýanwarda çärýek finalda duşuşarlar. Ýarym finalyň duşuşyklary bolsa 14-nji ýanwarda geçirilip, final duşuşygy 18-nji ýanwarda oýnalar.
1/8 finalyň oýunlary
3-nji ýanwar
Senegal – Sudan (21:00)
Mali – Tunis (00:00)
4-nji ýanwar
Marokko – Tanzaniýa (21:00)
Günorta Afrika – Kamerun (00:00)
5-nji ýanwar
Müsür – Benin (21:00)
Nigeriýa – Mozambik (00:00)
6-njy ýanwar
Alžir – Kongo DR (21:00)
Kot-d’Iwuar – Burkina Faso (00:00)
