UEFA-nyň klub ýaryşlarynyň täze möwsümine badalga berler

Ertir, has takygy, 16-njy sentýabrda UEFA-nyň klub ýaryşlarynyň täze möwsümine badalga berler. Ilkinji hepdede diňe UEFA Çempionlar Ligasynyň duşuşyklary geçirilip, Ýewropa Ligasynyň 1-nji tapgyrynyň oýunlary 24-nji sentýabrda, Konferensiýa Ligasynyň 1-nji tapgyrynyň oýunlary-da 2-nji oktýabrda başlanar. Geçen möwsüm ilkinji gezek liga görnüşde geçirilip başlanan ýaryşyň bu formatdakysy umumylykda şowly ýagdaýda tamamlandy. Şol formatdaky 2-nji möwsümde esasan hem, Çempionlar Ligasynda gyzykly bolmagyna garaşylýan ýa-da uly klublaryň arasyndaky duşuşyklaryň sanynyň köplügi futbol janköýerlerini hasam özüne maýyl edýär. Futbol janköýerleri şol duşuşyklara tomaşa etmäge eýýämden sabyrsyzlyk bilen garaşýar.

Çempionlar Ligasynyň 71-nji, Ýewropa Ligasynyň 55-nji, Konferensiýa Ligasynyň bolsa 5-nji möwsümi bolup, bu 3 ýaryşyň saýlama tapgyryna 150-den gowrak klub gatnaşdy. Geçirilen 400-den köp duşuşykdan soň 3 bäsleşigiň hersine 36, jemi 108 klub final tapgyrynda çykyş eder.  Şol 108 klub UEFA-nyň düzümindäki 55 ýurduň 39-syna wekilçilik eder. Geçen ýyl bu görkeziji 40-a deňdi. Şeýle-de, Malta UEFA-nyň klub ýaryşlaryna topar ugradan 52-nji ýurt boldy. Şu wagta çenli UEFA-nyň klub ýaryşlarynyň final tapgyrynda ýa-da ozalky toparçalarynda 55 ýurduň diňe 3-siniň wekillerine çykyş etmek başartmady. Ýagny şu wagta çenli Andorranyň, San Marinonyň hem-de Garadagyň ýeke kluby-da UEFA-nyň klub ýaryşlarynyň final tapgyryna gatnaşyp görmedi. San Marinonyň “Wirtus” topary şu möwsümde pleý-off tapgyryndan yzyna gaýtdy. Galan 52 ýurduň wekili, esasan hem Konferensiýa Ligasynyň esaslandyrylmagyndan soň futbol ligalary pesräk hasaplanýan ýurtlaryň klublary UEFA-nyň ýaryşynda özlerini görkezip başlady.

Çempionlar Ligasynda 16, Ýewropa Ligasynda 23, Konferensiýa Ligasynda bolsa 29 dürli ýurduň wekilleri özara bäsleşerler. Angliýa iň köp klub ugradan ýurt bolup, “Premier Liganyň” 20 klubunyň ýarysyna golaýy, ýagny 9-sy UEFA-nyň ýaryşlarynda çykyş eder. Çempionlar Ligasynda ilkinji gezek 1 ýurtdan 6 topar gatnaşyp, “Tottenham” Ýewropa Ligasynyň çempiony, “Nýukasl bolsa UEFA-nyň koefissentleriniň netijesinde ýaryşda oýnar. Ispaniýadan 8, Italiýadyr Germaniýadan hem-de Fransiýadan 7, Niderlandlardan 6, Portugaliýadan, Çehiýadan, Gresiýadan hem-de ähli topary-da Konferensiýa Ligasyna gatnaşýan Polşadan 4 klub çykyş eder.

Jemi 11 klub ilkinji gezek UEFA-nyň ýaryşlaryna gatnaşyp, olar “Gou Ehed Iglz” Ýewropa Ligasynda, «Kristal Palas», «Drita», «Hamrun Spartans», «KuPS», «Raýo Wallekano», «Samsunspor», «Şelburn», «Şkendiýa», «Sigma Olomous», «Uniwersitatea Kraiowa” toparlary-da Konferensiýa Ligasynda çykyş ederler.

Çempionlar Ligasyna bolsa ozal UEFA-nyň beýleki ýaryşlaryna wekilçilik eden klublaryň 4-si ilkinji gezek gatnaşyp, olar “Kairat”, “Ýunion Sent-Žilliuaz”, “Pafos” hem-de “Bude-Glimt” toparlarydyr. UEFA Çempionlar Ligasyna (1992-nji ýyldan bäri) adyny ýazdyran klublaryň sany 158-e ýetdi.

Norwegiýanyň çempionlary 17 ýyllyk arakesmeden soň bu ýaryşa goşular. Häzirki wagtda Norwegiýanyň goňşusy Finlýandiýadan bu ýaryşa 27 ýyldan bäri ýeke topar hem gatnaşman, bu görkeziji antirekorda deňdir. Finlýandiýadan şu wagta çenli diňe HIK topary wekilçilik edip, şol klub hem 1998/99 möwsüminde gatnaşypdy.

Çempionlar Ligasynda 2005/06 möwsüminden bäri ilkinji gezek ukrain toparlaryna çykyş etmek başardanok. Ukrainanyň 2 öňdebaryjy toparlary bu gezek bagtyny Konferensiýa Ligasynda synap görerler we ikisi-de ýaryşyň çempionlygynyň esasy dalaşgärleriniň hataryna görkezilýär.

Çempionlar Ligasyna final tapgyryna “Real Madrid” bilen “Barselona” 30-njy gezek gatnaşyp, madridliler yzly-yzyna 29 möwsümden bäri çykyş edip gelýärler. “Bawariýa” bassyr 18-nji, umumylykda 29-njy gezek Çempionlar Ligasyna gatnaşar.