Oýun oýnamak çagalaryň beden we ruhy taýdan sagdyn ösmegi üçin zerurdyr. Her halkyň gadymdan gelýän milli çaga oýunlary bolýar. Şeýle oýunlaryň birine «Skippy Roo» diýilýär. Bu oýun Awstraliýadaky çagalaryň arasynda meşhurdyr. Çagalar töwerek bolup ýere çommalyp oturmaly. Ulularyň biri ýa-da mugallym çagalaryň birini «möjek» saýlaýar. Gyzykly ýeri, bu ýurtda çagalaryň arasyndaky oýunlarda saýlanýan «möjege» «kenguru» diýilýär. Bu ýurtda yzky aýaklary bilen uzak aralyga böküp bilýän kenguru atly jandaryň ýaşaýandygyny hemmäňiz bilýän bolsaňyz gerek. «Kenguru» saýlanan çaga gözüni ýumup, aşak bakyp oturýar-da, «Skippy Roo, kenguru günortan yssyda uklaýar, bir awçy gelýär, gaç, gaç, gaç!» diýip sanawaç aýdýar. Soňra bolsa, mugallym ýa-da ulularyň biri çagalaryň birini gözi bilen yşarat edýär. Şol çaga «kengurunyň», ýagny ortada gözüni ýumup oturan çaganyň egnini elläp, «Bil bakaly, seni kim tutdy?» diýýär. «Kenguru» bolsa onuň kimdigini bilmäge synanyşýar. Eger bilse, ady tutulan çaga «kenguru» bolýar, bilmese, «kenguru» çaga oýny dowam edýär.
Bu oýun täze synpdaşlaryňyzy tanamak ýa-da bir ýere myhmançylyga baranyňyzda ol ýerdäki çagalar bilen has ýakyndan tanyşmak üçin örän gyzykly oýunlaryň biridir.
