AFK Çempionlar Ligasynyň çärýek finalynda “Al Hilal” öz meýdançasynda “Al-Ittihady” 2-0 hasabynda ýeňipdi. Jogap duşuşygy hem şol hasap bilen “Al Hilalyň” peýdasyna tamamlandy. “Al Hilala” ýeňiş getiren gollary 61-nji minutda topardaky 400-nji duşuşygyny oýnan Al-Şahrani hem-de 90+5-nji minutda braziliýaly Malkom geçirdi. Şunlukda, “Al Hilal” topary ähli ýaryşlary hasaba alanyňda yzly-yzyna 28-nji duşuşygynda ýeňiş gazanyp, dünýä rekordyny täzeledi. Soňky gezek sentýabr aýynda ýeňiş gazanyp bilmedik “Al Hilal” şondan bäri 3 ýaryşda (Saud Arabystanynyň çempionatynda, kubok ýaryşynda hem-de AFK Çempionlar Ligasynda) geçiren 28 duşuşygynda ýeňiş gazanyp, Uelsiň “Nýu-Seýnts” toparynyň 2017-nji ýyldan goýan 27 oýunlyk yzly-yzyna ýeňiş rekordyny täzeledi. “Nýu-Seýnts” topary bu ugurda “Aýaksyň” 44 ýyllyk rekordyny täzeläpdi.
Gündogar zolakda-da koreýleriň 2 klubunyň arasyndaky duşuşykda “Ulsan Hýundai” topary “Çonbuk Hýundai Motors” toparyny Seol Ýang Wunuň 45+2-nji minutdaky ýeke-täk goly bilen ýeňdi. 1-nji duşuşykda ýeňiş gazanan bolmandy (1-1).
Ýapon kluby “Ýokohama F. Marinos” topary öz meýdançasynda-da Hytaýyň “Şandun Taişan” toparyny Antoni Lopesiň 75-nji minutda geçiren goly esasynda iň kiçi hasap bilen ýeňdi. Ýapon kluby 1-nji oýunda 2-1 hasabynda utupdy.
“Al-Ain” bilen “Al Hilalyň” arasyndaky ýarym final duşuşyklary 16-njy we 23-nji aprelde geçiriler. “Ulsan Hýundai” bilen “Ýokohama F. Marinos” klublary finala çykmak üçin 17-nji we 24-nji aprelde ýarym finalda özara duşuşarlar.
