13-14-nji maýda Özbegistanyň Samarkant şäherinde zenanlaryň ykdysady, jemgyýetçilik, syýasy hukuklary we ygtyýarlyklary meselesine sebitleýin çemeleşme we olaryň mümkinçilikleriniň giňeldilmegine bagyşlanan Aziýa forumy geçiriler.
Iki günlük foruma Gündogar Aziýa, Günorta-Gündogar Aziýa, Günorta Aziýa we Merkezi Aziýa ýurtlarynyň zenan parlamentarileriniň, Hökümet ýolbaşçylarynyň, döwlet edaralarynyň we raýat jemgyýetiniň institutlarynyň wekilleriniň, işewür zenanlaryň, syýasatçylaryň, alymlaryň we ykdysadyýetiň dürli pudaklarynyň wekilleriniň gatnaşmagyna garaşylýar.
Forum 10 sany ugurdaş mejlisleriň çäklerinde geçiriler. Foruma gatnaşýanlar aýal-gyzlaryň ylym-bilim, telekeçilik we innowasiýa işlerine çekmek, olaryň ykdysady hukuklary we mümkinçilikleri ýaly zenanlaryň häzirkizaman ykdysadyýetiniň dürli pudaklaryna gatnaşygynyň meselelerini ara alyp maslahatlaşarlar.
Mundan başga-da, Durnukly ösüş maksatlaryna ýetmekde zenanlaryň gatnaşmagy meselesine garalar. Zenanlaryň ykdysady mümkinçilikleriniň giňeldilmegi, olaryň biznese we jemgyýete gatnaşyklaryny höweslendirmekde parlamentleriň ähmiýeti, maliýe mümkinçiliklerini ulanyp, gender tapawudy aradan aýyrmak, zenanlara we çagalara garşy zorlugyň ähli görnüşlerini ýok etmek meselelerine aýratyn üns gönükdiriler.
Foruma gatnaşyjylar hökümete degişli bolmadyk täjirçilik däl guramalaryň “ýaşyl” ykdysadyýeti ösdürmek, howanyň üýtgemeginiň sebitdäki gender meselelerine täsiri, şeýle hem zenanlaryň hukuklaryny we bähbitlerini goramakda öňdebaryjy tejribäni we innowasion çemeleşmeleri ara alyp maslahatlaşarlar. Forumyň netijesinde Samarkant Jarnamasyny kabul etmek meýilleşdirilýär.
