Türkmenistanyň Daşary işler ministrliginiň Halkara gatnaşyklary instituty Türkmenistanyň Magtymguly adyndaky Ýaşlar guramasynyň Merkezi geňeşi bilen bilelikde 11-nji synp okuwçylarynyň arasynda geçirilen ders olimpiadanyň ýeňijilerini we onda baýrakly orunlary eýelänleri yglan etdi.
Türkmenistanyň taryhy, matematika, iňlis we türkmen dilleri boýunça onlaýn olimpiadalar «Watanyň daýanjy – bilimli ýaşlar, Arkadagly Gahryman Serdaryň guwanjy ýaşlar!» şygary bilen iki tapgyrda geçirildi.
Olimpiadalaryň jemi boýunça ýokary – Baş baýraga Mary welaýatynyň Mary şäherindäki 1-nji orta mekdebiň okuwçysy Orazmuhammet Kakabaýew mynasyp boldy.
Birinji orny Aşgabat şäherindäki Saparmyrat Türkmenbaşy adyndaky ýöriteleşdirilen mekdep-internatynyň okuwçysy Ýusupbaý Ýangibaýew we paýtagtymyzdaky 135-nji orta mekdebiň okuwçysy Maksat Babageldiýew eýelediler.
Ikinji orny Mary welaýatynyň Sakarçäge etrabyndan gatnaşan mekdep okuwçylary Aýgül Sähedowa (daşary ýurt dillerini çuňňur öwrenýän 35-nji ýöriteleşdirilen mekdep) we Ogulgözel Döwletowa (32-nji orta mekdep) berildi.
Üçünji orny Balkan welaýatynyň Balkanabat şäherinden gatnaşan ýokary synp okuwçylary Zeýnep Geldiýewa (iňlis dilini, fizikany we matematikany çuňňur öwrenýän 22-nji orta mekdep), Gürmämmet Nobatow (17-nji orta mekdep), şeýle hem Aşgabat şäherindäki 21-nji orta mekdebiň okuwçysy Mähriban Azadowa eýelediler.
Paýtagtymyzyň we ýurdumyzyň welaýatlarynyň mekdeplerinden ýarym müňe golaý okuwçy olimpiada gatnaşyp, öz ukyp-başarnygyny we bilimini görkezdiler.
Olimpiada Birleşen Milletler Guramasynyň Baş Assambleýasynyň bilimiň ählumumy parahatçylygy we ählumumy durnukly ösüşi gazanmakdaky möhüm ornuny dabaralandyrmak üçin 2018-nji ýylyň 3-nji dekabryndaky rezolýusiýasy bilen yglan edilen Halkara bilim gününe bagyşlandy.
Olimpiada ýurdumyzyň ýaşlarynyň intellektual ukybyny ýokarlandyrmaga, mekdep okuwçylarynyň hünär saýlamagyna ýardam etmäge, olaryň zehinini ösdürmäge, has zehinli we başarjaň okuwçylary ýüze çykarmaga gönükdirilendir.
Çeşme: education.gov.tm
