Türkiýäniň çempionatynda sanawyň lideri “Galatasaraý” 34-nji tapgyrda myhmançylykda “Adana Demirspory” 3-0 hasabynda utdy. Stambullylara ýeňiş getiren gollary Hakim Ziýeş, Kerem Demirbaý hem-de Mauro Ikardi geçirdi. Bu “Galatasaraýyň” çempionatda yzly-yzyna gazanan 15-nji ýeňşi bolup, Okan Burugyň şägirtleri “Süper Ligiň” rekordyny täzelemegi başardy. Bu ugurda ozalky rekord hem “Galatasaraýa” degişli bolup, olar geçen möwsümde yzly-yzyna 14 oýunda ýeňiş gazanypdy.
Şeýle-de duşuşykda “Galatasaraý” toparynyň urugwaýly derwezeçisi Fernando Muslera hem öz rekordyny täzeledi. Bu oýun bilen Musleranyň şu möwsümde gol geçirtmedik duşuşyk sany 17-ä çykdy. Mundan öňki rekord hem onuň özüne degişli bolup, ol bir möwsümde 16 oýunda derwezesini goldan gorapdy.
