Türkiýäniň Antalýa şäherinde Halkara syýahatçylyk karikaturalary ýaryşy geçirildi. 15-nji gezek geçirilýän ýaryşda ýeňiji bolanlara şäheriň “ASKA Lara” otelinde dabaraly ýagdaýda baýrak gowşuryldy. 2009-njy ýyldan bäri geçirilýän surat ýaryşynda “Ýaşlar” we “Ulular” atly esasy iki kategoriýada baýraklar gowşurylýar. Ýaryşa dünýäniň 46 ýurdunda jemi 359 suratkeş jemi 638 eserini iberipdir.
16 ýaşdan kiçiler “Ýaşlar” kategoriýasyna, 17 ýaşlylar we ondan ulular öz eserlerini “Ulular” kategoriýasyna iberip bilýär. Hersinden birinjilik, ikinjilik we üçünjilik ugrundan baýraklar berilýän bu iki kategoriýadan başga-da, halkara ýaryşyň esaslandyjylarynyň biri bolan professor Atila Özeriň adyny göterýän ýene bir baýrak berilýär.
Ýaryş her ýyl bir tema bagyşlanýar. Mundan ozalky ýyllarda “Hemmesi içinde ulgamy,” “Syýahatçylyk we parahatçylyk”, “Syýahatçylygyň geljegi, geljegiň syýahatçylygy”, “Geçmişden şu güne dynç alyşlar”, “Syýahatçylyk ýatlamalary”, “Aeroport”, “Covid 19 we Syýahatçylyk”, “Syýahatçylyk pudagynyň işgärleri”, “Kosmos syýahatçylygy” we “Syýahatçylyk pudagynda zenanlar” ýaly temalarda surat ýaryşlary geçirildi. Bu ýylky ýaryş bolsa, ýerli ýaşaýjylar bilen syýahatçylaryň arasyndaky gatnaşyga bagyşlanýar.
“Ulular” ugrundan belgiýaly Luk Wernimmen birinji, bolgariýaly Alla we Çawdar Georgiewler ikinji we Çeh Respublikasyndan Ewžen Dawid üçünji orny eýeledi. Atila Özeriň adyna berilýän baýragy bolsa, rumyniýaly Doru Aksinte aldy. “Ýaşlar” kategoriýasynda bolsa üç ýeri hem türkiýeli suratkeşler eýeledi. Ümmühan Zeýnep Akýürek, Sudenur Küçükbaş we Yşyl Efe degişlilikde birinji, ikinji we üçünji orunlary eýelediler.
