Russiýanyň Prezidenti Wladimir Putin 16-17-nji maýda Hytaýa döwlet saparyny meýilleşdirýär. Bu barada TASS habarlar gullugy Kremliň metbugat gullugyna salgylanyp habar berdi.
Russiýanyň Prezidentiniň Hytaýa sapary onuň gaýtadan Prezident saýlanmagyndan soň ilkinji daşary ýurt sapary bolar. Bu sapar Hytaýyň Başlygy Si Szinpiniň çakylygy boýunça amala aşyrylar. Wladimir Putin saparynyň dowamynda Pekine we Harbine baryp görer.
Rus we Hytaý liderleri ýurtlaryň arasyndaky diplomatik gatnaşyklaryň 75 ýyllygyny bellärler. Döwlet Baştutanlary hyzmatdaşlyk we halkara meselelerini ara alyp maslahatlaşarlar. Wladimir Putin Hytaý Halk Respublikasynyň Döwlet Geňeşiniň Premýer-ministri Li Sýan bilen hem duşuşar.
Şeýle hem, Wladimir Putin saparyň dowamynda sekizinji rus-hytaý sergisiniň açylyş dabarasyna, sebitara hyzmatdaşlyk boýunça dördünji rus-hytaý forumyna, şeýle-de Harbin politehniki uniwersitetiniň talyplary we mugallymlary bilen duşuşyga gatnaşar.
